Membru Parlamentu Foinsa’e (MPF) period 2013-2015 distritu Ainaro ejiji formasaun kapasitasaun, tanba bainhira simu tomada de pose iha Fulan Agostu 2013 to’o agora seidauk iha kapasitasaun ba sira. 
Membru Parlamentu Foinsa’e husi distritu Ainaro, Cecilia Rosario, hateten sira simu pose besik tinan ida ona maibe to’o ohin loron seidauk iha formasaun kapasitasaun ba membru iha teritorio tomak.
“Ami nia mandatu nudar membru parlamentu foinsa’e tinan rua deit, oportunidade ne’e importante tebes ba ami atu hetan kapasitasaun espesifiku ruma husi governu,” Rosario hateten.
Tanba ne’e, nia husu ba Sekretariu Estadu Joventude no Desportu (SEJD), atu fo formasaun ruma ba sira, tanba sira mak nudar matan no tilun ba foinsa’e sira iha nasaun Timor-Leste.
Entretantu, reprejentante Conselho Nasional Joventude Timor–Leste (CNJTL), João do Nascimento, rekonese kestaun ne’e, maibe orsamentu mak limitadu.
“Orsamentu sai tarde, ita labele halo buat ida,” nia dehan.
Maibe, nia hateten, formasaun sei hahu iha fulan ida ne’e hafoin selebra loron paskoa.
Nia hatutan, formasaun ne’e sei foka liu ba asuntu sira, hanesan direitu humanus, sidadania, korupsaun, promosaun igualidade jeneru (violensia domestika), direitu labarik, meiu ambiente no seluk tan.
Nia hatutan, liu katak formasaun kapasitasaun sira hotu sei halo iha tempu feriadu atu nune’e labele fo impaktu ba prosesu aprendizajen.
Programa ida ne’e hahu iha tinan 2010 husi governu no hetan supporta finanseiru no tekniku husi ajensia internasional UNICEF, ho objetivu prepara foinsa’e sira hahu agora sai lideransa ne’ebe karismatiku no intelektual iha futuru.
