Organizasaun Nasional Judicial System Monitoring Program (JSMP), preokupa maka’as kondisaun Instituisaun Defensoria Publiku (DP) ne’ebe to’o ogora sei menus fasilidade hodi halo servisu iha baze.
Diretor Ezekutivu JSMP, Luis de Oliveira Sampaio, hateten dala ruma defensor public hakarak atu ba identifika kazu iha baze, maibe labele ba, tanba laiha transporte.
“Liu-liu ba hasai foto hanesan evidensira ba sira nia kliente iha tribunal, maibe la konsege, tanba laiha kamera,” Diretor JSMP, Sampaio kestiona, iha Colmera, Dili.
Tanba ne’e, nia dehan, kuandu fasilidade laiha oinsa bele ejiji profesionalismu. “Defensor ida atende kazu mais umenus 100 resin,” nia dehan.
Nia hato’o kestaun hirak ne’e bazeia ba peskiza ne’ebe JSMP halo iha tinan kotuk (2013).
Entretantu Prezidente DP, Sergio Hornai, hateten kada tinan sira hetan duni orsamentu, maibe ladun barak.
“Entaun ita tenke utiliza osamentu sira ne’e ho proporsionalidade, ho lolos, atu nune’e labele iha orsamentu ne’ebe demaziadu,” nia hateten.
