Membru Parlamentu Nasional ejiji ba Sekretariu Estadu Eletrisidade (SEE) atu aselera lalais prosesu instalasaun cabo sub-marinu ba komunidade iha sub-distritu Atauru, nune’e bele asesu ba ahi mos.
Prezidente Komisaun F (infra-estraturas, transporte no komunikasaun), Deputadu Pedro da Costa Martires, hateten orsamentu ba planeamentu prosesu instalasaun cabo sub-marinu ba Atauru aprova ona husi OJE 2014 nian.
“Lina enerjia eletrika ne’e sei dada husi tasi okos ho cabo sub-marinu 20 KWh ba komunidades iha Atauru,” Prezidente Komisaun E Parlamentar ne’e hateten, iha Parlamentu Nasional.
Iha fatin hanesan Deputadu Inacio Moreira, hateten prosesu instalasaun ba cabo sub-marinu ba Atauru ne’e defisil tebes.
“Hau husu ho haraik an, diak liu haluha tiha cabo sub-marinu ne’e, no halo fali buat seluk,” Deputadu Moreira sujere.
Hatan ba preokupasaun ne’e Sekretariu Estadu Eletrisidade(SEE), Januario Pereira, katak cabo sub-marinu husi Dili ba Atauru dokumentus inisial iha ona, maibe konsultor sei supervisiona alta tensaun sentral eletrika ninian.
“Ami koalia ona ho sira, oinsa para sira aprofunda liutan hodi teste kompania ne’ebe mak atu instala cabo sub-marinu ne’e,” SE Pereira hateten.
Nia hateten, prosesu ne’e sei la’o hela, tanba sei halo estudu viabilidade.
