Membru Parlamentu Nasional kestiona maka’as kona ba labarik sira ne’ebe kontinua fase kareta iha dalan ibun iha area Kaikoli nian, tanba sira servisu iha oras eskola nian.
Deputadu Cesar Valente de Jesus, hateten labarik sira ne’e fase kareta iha los Ministeriu Solidaridade Sosial (MSS) nia sorin, maibe la tau matan.
“Hau haree labarik barak mak halibur malu fase kareta iha oras eskola nian, sira ne’e eskola ga la’e?,” Deputadu Cesar Valente de Jesus kestiona, iha Parlamentu Nasional.
Nia hateten, iha artigu 6 konstitusaun, hateten objetivu estadu ninian atu harii sosiedade ida ne’ebe hatuur iha justisa social.
Nia dehan, ema bo’ot nia oan sira ba eskola iha fatin diak, maibe povu kiak nia oan abandonadu.”Ita presiza haree para hodi hatuur justisa sosial duni,” Deputadu ne’e dehan.
Entretante Ministra Solidariedade Sosial (MSS), Isabel Guterres, sente triste mos, tanba lolos labarik sira ne’e ba eskola no halimar iha uma, la’os ba fase fali kareta iha estrada ninin.
“Ami servisu hamutuk ho NGO sira ne’ebe haree kona ba labarik sira ne’ebe iha estrada laran,” Ministra Guteres hateten.
Tinan-tinan, nia dehan, governu aloka osan ba organizasaun sosiedade sivil sira hodi ajuda servisu ba labarik sira ne’ebe iha dalan ninin.
