Departamentu Polisia Komunitaria (POLKOM) Nasional iha tempu badak sei fo treinamentu ba membrus seguransa voluntaria iha distritu Viqueque, iha sub-distritu Ossu.
Xefe Departamentu Polisia Komunitaria Nasional, Adjuntu Helena Das Dores Alves, hateten seguransa volunteer ne’e involve eis veteranus no joventude sira, hodi oinsa bele asegura seguransa iha suku laran.
Maibe, nia dehan, antes atu sai membru seguransa volunteer, sira tenke tuir uluk treinamentu baziku, oinsa atu foti maneira resolve problema.
“Iha treinamentu ne’e sei fo material kona ba kontrolu seguransa, oinsa sira hala’o sira nia funsaun ho diaK iha komunidade nia le’et,” Adjuntu Alves haktuir.
Treinamentu dahuluk, nia dehan, halo ona iha distritu Ermera iha suku Poetete, agora seguransa volunteer sira iha fatin refere komesa halo ona sira nia funsaun.
Enkuantu Deputadu Cesar Valente, suporta tebes inisiativa ne’e, tanba bele involve komunidade hodi kontribui ba seguransa rai laran liu-liu iha sukus laran.
“Ne’e diak, tanba kolabora ho komunidade atu asegura seguransa iha sira nia bairu ou suku laran rasik,” Deputadu Valente hateten.
Nia esperansa, katak liu husi programa ne’e bele diminui ona kazu krimi iha rai laran.
