Ministeriu Obras Publiku hahu halo rehabilitasaun ba estradas iha Dili laran inklui trotoar sira ho emerjensia, hodi prepara ba ximeira Comunidade Paises da Lingua Portugues ne’ebe sei hala’o iha Timor-Leste, iha tempu badak.
Sekretariu Estadu Obras Publiku (SEOP), Luis Vaz Rodrigues, hateten agora dadaun kompania nasional ida kaer hela obra iha dalan Mandarin no Bemori, halo luan tan estrada inklui halo ho bee dalan.
“Obra ne’e halo, tanba iha tempu badak ita sei sai uma nain ba ximeira CPLP,” SE Rodrigues.
Nia dehan, ximeira Comunidades Paises da Lingua Portugues (CPLP) ne’e rasik sei hala’o iha fulan Jullu tinan ne’e, no reprezentante husi nasaun CPLP hotu sei mai iha ne’e.
“Ita presiza hatudu imajen nasaun Timor-Leste ne’ebe diak, tanba ne’e mak ita hadia dalan sira ne’e,” nia dehan.
Iha parte seluk membru Komisaun E (transporte, telekomunikasaun no infra-estruturas), Deputadu Inacio Moreira, apoia no presiza duni hadia dalan sira ne’e, sai uma nain tenke iha preparasaun ne’ebe diak.
“Maibe tenke halo ho kualiadade diak,” nia hateten.
Nia mos sujere, MOP tenke aselera rehabilitasaun Estrada iha Colmera no ponte Comoro ne’ebe to’o agora seidauk remata ne’e.
“Kestaun sira ne’e presiza haree hotu,” Deputadu husi bankada Fretilin ne’e sujere.
