Embaixador Australia Iha Timor –Leste, Peter Doyle, hateten governu Australia iha komitmentu bo’ot atu apoia Timor –Leste liu husi Ministerio Saude no parseirus sira seluk hodi hadia no salva inan ho labarik sira iha Timor laran tomak. 
Nia haktuir, iha tinan 2007 governu Australia hahu apoiu planu prioridade Ministerio Saude no aktividades Organizasaun Internasional Marie Stopes Timor –Leste (MSI-TL) nian iha distritu walu hodi fo atendementu ba saude inan, saude seksual no seluk tan.
“Governu Australia Iha komitmentu bo’ot atu hadia saude inan ho oan sira iha TL laran tomak,” Governante Australia ne’e hateten, iha Dili.
Nudar embaixador foun ba Timor –Leste, nia dehan, iha tempu besik sei haleu distritus hodi haree direitamente servisu MSI-TL nian no programa Ministeriu Saude nian ne’ebe finansia husi governu Australia.
Entretantu Ministru Saude, Sergio da Costa Lobo, rekonese taxa mortalidade inan ho oan Timor –Leste sei as iha mundu tuir Demography Health Survey 2009-2010, tanba ne’e presiza koperasaun servisu ho parseirus hotu.
Ministeriu presiza tebes apoia husi MSI-TL, tanba ita hotu hatene numeru mortalidade inan ho oan sei as iha mundu, liu-liu iha Timor-Leste,” Ministru Lobo hateten.
Iha fatin hanesan, Country Diretor MSI-TL, Nicola Morgan, hateten prezensa MSI iha Timor –Leste atu ajuda governu hodi hadia estatutu mortalidade inan ho oan inklui pubreza.
Nia hatutan,tinan hitu ona MSI nia prezensa iha TL no konsege kobre ona distritu walu (Dili, Baucau, Bobonaro, Ermera, Viqueque, Ainaro, Lautem no distritu Manufahi), no sira mos iha planu sei habeler iha distritu seluk iha future.
“Ajuda governu fo atensaun ba saude reprodutivu, planeamentu familiar, moras hada’et husi relasaun seksual ho seluk tan,” nia dehan.
Tuir dadus iha tinan 2013 MSITL ajuda ona Ministerio Saude fo atendimentu planeamentu familia ba ema nain 38,139 no atendimentu kuidadu saude inan hamutuk 6,470 inklui mos atendimentu ba moras hadaet liu husi relasaun seksual iha fasilidade saude publiku.
