Estudantes universitario sira sujere ba Asosiasaun HAK atu organiza seminario nasional ida hodi konvida ukun nain sira inklui mos reprejentante governu Japaun nian iha Timor-Leste atu hateten buat ruma ba povu Timor liu –liu inan feto sira ne’ebe sai atan seksual. 
Inocençio De Jesus Xavier nudar estudantes hateten povu Timor –Leste liu –liu vitima Jugun Ianfu (atan seksual) ne’ebe sei moris no familia iha direitu atu hetan informasaun husi governante Japaun nia responsabilidade ba aktu ida ne’e military Japaun komete iha tinan 72 liu ba (1942-1945) ba.
Nia hatutan nudar estudantes no jerasaun foun ba rai doben ida ne’e sira mos iha obrigasaun atu hatene istoria Timor –Leste nian tanba durante ne’e sira hatene mak II Geramundial maibe kazu jugun ianfu ne’e sira laiha kuinesementu tanba sira la rona iha materia sira ne’ebe sira aprende iha eskola.
“Ami estudantes sujere ba asosiasaun HAK atu kopera ho entidade hotu hodi realize seminario nivel nasional ida konvida governate husi nasaun rua ne’e no orgaun legislador sira atu fo informasaun ruma liga ho kazu Jugun Ianfu,” Nia Sujere bainhira partisipa iha selebrasaun 72 Invasaun Japaun iha Timor –Leste.
Nia hatutan seminario ne’e importante tebes tanba defaktu durante ne’e HAK halo esforsu balun atu ejiji responsabilidade husi governu Japaun maibe laiha governante ruma husi Timor –Leste no Japaun hola parte atu fahe informasaun ba povu.
Entertantu, Kordenador Programa Asosiasaun HAK, Sisto Dos Santos simu no apresia ho sujestaun ne’ebe estudantes sira hato’o signifika katak foinsa’e sira mos iha hakarak atu hatene istoria funu Timor –Leste nian.
Nia hatutan Asosiasaun HAK sei esforsu atu organiza seminar ne’e atu konvida governante sira husi nasaun Japaun inklui mos Timor –Leste obrigasaun atu hato’o sira nia esforsu no responsabilidade ba aktu ida ne’e tanba ne’e violasaun direitus humanus ne’ebe grave.
“Ita tenta hela ho kolega sira hotu inklui estudantes universitario hein katak ita bele kolabora hodi realize seminario ida ne’e,” Dehan Sisto.
Nia hatutan, vitima balun sei moris hela maibe oras ne’e dadaun sira susar ona atu hola parte iha atividade hotu tanba maioria ferik ona ho kondisaun ne’ebe la permite ona atu sai husi uma.
