Substituisaun Roo Nakroma, Roo Anugrah falta oituan mout iha tasi Atapupu, distritu Atambua-Indonezia baliza ho tasi Batugade, Timor-Leste nian tanba anin no udan bo’ot ne’ebe akontese iha semana rua ba kotuk iha fati ne’eba.
“Sai husi Oe-Cusse mai to’o iha Atapupu, odamatan roo nian ne’e monu tiha tanba udan no anin no halo pasajeiru sira iha roo laran paniku tiha,” Deputadu Pedro da Costa Martires, iha Parlamentu Nasional.
Deputadu husi bankada CNRT ne’e, hateten nia parte kontaktu kedas ba Forsa Defeza Indonezia no Forsa Defeza Timor-Leste nian ne’ebe servisu iha fronteira hafoin simu informasaun husi pasajeiru ida iha roo laran ne’e hodi ajuda sira.
“Maibe sira mos labele halo buat ida tanba sira laiha roo bo’ot atu ajuda, entaun pasajeiru sira tanis hodi hein ajudus husi governu apoia helikoptru atu salva sira,” Deputadu husi Komisaun E (infra-estruturas, transportes no komunikasaun) ne’e hateten.
Iha fatin hanesan komunidade Oe-Cusse atual Deputadu Jacob Araujo, hateten total pasajeirus iha roo laran iha momentu ne’eba hamutuk 210 pesoas.
Akontesementu ne’e rasik akontese iha loron 17 Fevereiru 2014 iha tuku ida kalan. “Iha momentu ne’e roo Anugrah ne’e sai demora oituan,” Deputadu Araujo hateten.
Iha momentu ne’eba, nia parte kontaktu kedas ba Ministru Transportes no Komunikasoens no ministru tun hamutuk ho nia vise no ho nia diretor tun kedas hodi kontaktu ba iha Sekretariu EStadu Seguransa par abele fo apoia ho urjentemente.
“Presiza roo lima ka neen hanesan ne’e para tula sai ita nia komunidade sira hamutuk 210 iha roo laran ne’e,” nia dehan.
Hatan ba kestaun ne’e, Sekretariu Estadu Interinu Asuntu Parlamentar, Nelio Isaac Sarmento, katak ekipa governu nian desloka ona ba Oe-Cusse atu buka dalan hodi salva populasaun sira iha roo laran ne’e.
“Ministeriu Transporte Telekomunikasaun ninian oras ne’e dadauk sira iha ona Oe-Cusse tenta ona ba Indonezia para sira apoiu hasai pasajeiru iha ro laran ,” nia hateten.
Nia dehan, ekipa Ministeriu Transporte no Telekomunikasaun (MTT) aluga fali kareta atu fasilita pasajeiru sira liu husi rai maran ba Oe-Cusse.
Aliened ne’e nia dehan, governu oras ne’e dadauk diskuti hela iha Konselhu Ministru, oinsa atu fo apoiu tan ba iha ne’eba.
