Medikus Ospital Nasional Guido Valadares (HNGV) hamutuk ho Corean Association of Research and Charity for Craniofacial Deformity (CARCCD) hala’o operasaun gratuita ba labarik sira ne’ebe moras ibun sakat. 
Prezidente CARCCD, Pill Hoon Choung, hateten programa ne’e hanesan ajuda umanitaria ida husi nasaun Korea ba povu Timor –Leste, hodi hametin liu tan relasaun entre nasaun rua ne’e.
Nia haktuir, aktividade operasaun no konsulta ba ibun sakat liu –liu labarik sira ne’e hahu kleur ona iha distritu Lautem no Oe-Cusse hodi halo operasaun ba labarik sira ne’ebe ho kondisaun ibun sakat iha distritu.
“Atividade ida ne’e doutor sira harakak ajuda labarik Timor –Leste sira ne’ebe kondisaun ibun sakat,”Prezidente Choung hateten, iha Bidau, Dili.
Nia hatutan, aktividade hanesan ne’e hala’o ona iha nasaun kuaze 22 inklui Timor –Leste, hakarak ba halo operasaun iha teritorio tomak, maibe ospital iha distritu laiha kondisaun liu –liu ekipamentus ne’ebe sufsiente.
Iha parte seluk, Koordenador aktividade operasaun ne’e, Francisco da Conçeicão, hateten iha Timor –Leste labarik barak mak ho kondisaun ibun sakat, oituan deit mak mai halo operasaun, tanba falta informasaun.
“Informasaun mak la to’o iha komunidade sira, tanba aktividade ne’e derepente deit, entaun pasiente mos mai ida rua deit,” nia dehan.
Nia hatutan aktividade operasaun ne’e hahu iha dia 17 to’o 22 fulan Febreiru no konsege halo operasaun ba labarik kuaze 20 resin balun husi distritu maibe barak liu husi Dili.
Entretantu, Diretor Jeral Ospital Nasional Guido Valadares (HNGV), Domingos Soares, hateten sira fahe informasaun ba komunidades iha 13 distritus liu husi fasilidade saude, maibe depende ba pasientes.
Nia rekonese, katak komunidade barak informasaun la to’o ba sira, tanba susar atu asesu ba informasaun iha balun mak labele mai iha Dili atu halo operasaun ho tanba laiha osan transporte no seluk tan.
