Vitima DM tenke simu pankada husi nia oan rasik ho inisial TB, tanba vitima DM husik responsabilidade ba arguido ho nia alin sira husi fen primeiru no abandona tiha.
Kazu ne’e rasik akontese iha aldeia Bebonuk, distritu Dili, iha dia 13 Junu tinan 2010. Vitima DM, deklara ba tribunal, katak iha lokraik ida mais u menus tuku 16:00, arguido TB (aon rasik) mai hasoru vitima iha uma (vitima hela ho feto ki’ik) atu husu osan, maibe iha altura ne’eba vitima laiha osan.
Iha momentu ne’eba, vitima DM promote ba arguido, katak kalan mak haruka arguido mai fali hodi vitima buka impresta.
“Hau ba impresta kolega nian, maibe laiha, tanba hau nia kolega ne’e iha momentu ne’eba nia sai hela ba distritu,” vitima DM deklara ba Tribunal Distrital Dili (TDD).
Nia deklara tan, katak iha loron tuir mai tuku 08:00 hanesan ne’e, arguido mai ho nia alin ikun, iha momentu ne’eba vitima tur hela iha uma kotuk simu hela telefone hosi kolega servisu, hotu tiha vitima ba hasoru arguido katak osan seidauk iha, tanba impresta osan maibe ema laiha.
“Derepenti nia uja xavi motor ne’e tuda ba hau nia fen ki’ik nia ulun no hau dudu nia no nia halai ba liur foti ai iha uma oin baku vidru to’o rahun,” vitima DM deklara.
Tanba ne’e, vitima halai atu ba kaer arguido, maibe arguido dudu vitima no baku iha kabun laran, rezulta vitima monu kedas ba rai.
Entretantu arguido TB iha nia deklarasaun iha tribunal, katak dezde vitima hola feto ki’ik nunka tau matan ba nia (arguido) ho nia alin sira no nia inan, no wainhira arguido ba husu osan sempre laiha hela deit.
“Hau nia apa ne’e servisu osan iha, maibe kuandu ami ba husu osan sempre laiha hela deit,” arguido TB hateten.
Arguido deside baku nia aman (vitima DM) tanba konsidera hahalok DM ne’e demais liu ona, bainhira arguido mai husu osan sempre dehan laiha.
Maske nune’e arguido rekonese, katak hahalok ida ne’e la diak no promote sei la halo tan iha future no arguido mos husu ona deskulpa ba vitima DM, maske aman seidauk fo perdua ba nia.
Hare ba deklarasaun husi vitima no arguido Juis Prezident fo pena suspensaun tinan rua ba arguido.
