Professor Eskola Ensino Baziku iha Fatuberliu, distritu Manufahi, halo agresaun fiziku ba alunus hamutuk nain 10 resin no husi numeru ne’e nain rua ho kondisaun grave.
Deputadu Leonel Marcal, hateten estudante nain rua ne’e la tama eskola durante semana ida ona, tanba sira nia ain bubu hotu no la’o labele.
“Sira nain rua to’o agora grave, ain bubu hotu , tanba baku ho embrego bo’ot kona labarik nia ain urat no to’o agora ran sei suli,” Deputadu Marcal levanta iha plenaria Parlamentu Nasional.
Deputadu membru Komisaun F (edukasaun, saude, kultura, veteranus no igualidade jeneru) ne’e, konta katak hafoin akontesementu ne’e, sira nia inan aman lori kedas vitima ba ospital Same.
Maibe nia dehan, doutor haruka vitima ba hato’o keixa iha polisia para halo investigasaun, tanba kanek bo’ot no ran sai maka’as.
“Hau rasik haree ho matan labarik nain rua ne’e, karik laiha tratamentu ida ke diak ba sira, labarik sira ne’e bele cacat,” Deputadu Marcal lamenta.
Tuir nia, hahalok professor ne’e fo ameasas ba labarik sira hodi tauk la ba eskola.
“Agora dadauk profesor sira ameasa fali alunus sira, katak sei taka eskola no sira sei abandona estudantes,” nia hateten.
Deputadu husi bankada Fretilin ne’e husu ba Ministeriu Edukasaun atu halo investigasaun ba professor ida ne’ebe uja fiziku mak hasoru alunus.
Lamentasoens hanesan mos hato’o husi Deputadu Antonio Serpa, katak profesor la’os deit baku estudantes, maibe sira mos halo kobransa illegal ba alunus sira.
“Iha eskola Ensino Baziku Sentral Laleia, Manatuto nian, inan aman sira fo hatene mai hau, katak sira halo kobransa kada alunu U$10,” Deputadu Serpa hateten.
Nia dehan, kobransa agora dadauk la’o hela iha eskola ida no lolos eskola iha konsensoens eskolar nian, la’os kobra fali osan husi alunus.
Entratentu tuir rede edukasaun Timor-Leste Coalition for Education (TLCE), katak professor bakun alunus to’o grave ne’e krime no tenke prosesa tuir dalan legal.
“Ami rede edukasaun TLCE lamenta tebes attitude professor ne’ebe hanorin alunus ho violensia,” Koordenador programa TLCE, Matias dos Santos lamenta.
Nia dehan, regulamentu edukasaun nian la fo dalan ba profesor sira uja maneira violentu hasoru estudantes.
“Professor nia knaaar mak eduka ema sai ema,maibe la’os eduka ho fali violensia hasoru estudantes,” nia hateten.
Wainhira TDW koko konfirma asuntu ne’e ba iha Ministru Edukasaun, Bendito Freitas, maibe la konsege tanba okupadu.
