Membru Parlamentu Nasional preokupa ho servisu Polisia Komunitariu (POLKOM) iha baze ne’ebe ladun efetivu, tanba laiha transporte ne’ebe bele eleva sira nia servisu.
Membru Komisaun B (seguransa, defeza no negosiu estranjeirus), Deputadu Cesar Valente de Jesus, hateten POLKOM seidauk hatudu sira nia servisu ho maksimal.
“Efetivu ne’e ki’ik liu, pursentu 0,59 resin deit,” Deputadu Cesar Valente de Jesus hateten, iha Parlamentu Nasional.
Nia dehan, bainhira Komisan B halo fiskalizasaun iha baze, deskobre katak sira hala’o sira nia knar maibe laiha transporte hodi fasilita sira.
“Hanesan la’o ba sukus tenke la’o ain deit, ne’e oinsa maka servisu bele la’o diak,” nia preokupa.
Tanba ne’e nia husu ba governu atu toma atensaun ba kestaun ne’e, nune’e sira bele hala’o sira nia servisu diak no efetivu liu tan iha baze.
Iha parte seluk Adjuntu Xefe Departamentu POLKOM, Helena Das Dores Alves, rekonese katak dadaun ne’e sira infrente duni problema transporte no seluk tan.
“Transporte hanesan kareta, motor no mos radio komunikasaun, hela fatin iha suku laran, hahan no seluk tan,” Adjuntu Alves hateten.
Aleinde ne’e , nia afirma, POLKOM rasik sei infrenta kona ba rekursu humanu. “Ita nia sukus iha Timor ne’e hamutuk 442 no ita nia membru Polisia Komunitaria to’o agora sei menus,” Adjuntu Alves hateten.
Nia hateten, difikuldade hirak ne’e husi parte Komando Jeral Polisia Nasional Timor-Leste (PNTL) hato’o ona ba governu.
