Membru Parlamentu Nasional diskunfia Parlamentu Nasional iha indikasaun korupsaun ba kareta parlamentu nian, tanba balun para deit ( la uja) maibe kustu ba kombustivel loro-loron sai hela deit.
“Ita kritika membru governu sira, maibe parlamentu rasik korupsaun barak los, kareta sira bara-barak para la la’o mais osan kombustivel semana-semana sai,”Deputadu Osorio Florindo kestiona, iha plenaria Parlamentu Nasional.
Deputadu husi bankada Fretilin ne’e, husu atu hasai xefe ne’ebe xefia hodi haree ba kombustivel ba kareta parlamentu nian, tanba Komisaun Anti Korupsaun investiga hela.
“Ita kritika ema do’ok, maibe parlamentu rasik ita husik deit,” Deputadu Florindo preokupa.
Iha fatin hanesan Deputadu Natalino dos Santos, husu atu rezolve problema ne’e ho seriu.
“Se la’e ita mak kritika-kritika governu, maibe ita nia jestaun rasik ita la hadia,” Deputadu husi bankada Congresu Nasional Rekonstrusaun de Timor (CNRT) ne’e sujere.
Nia dehan, ida ne’e hahalok korupsaun, tanba maske kareta para hela maibe mina la’o nafatin.
“Hau husu ba senhor prezidenti atu haree kona ba jestaun ne’e,” nia sujere.
Hatan ba preokupasaun ne’e Vise Prezidente Parlamentu Nasional, Deputadu Aderito Hugo, katak parlamentu sei konsidera ba preokupasaun ne’e.
“Ami konsidera senhor Deputadu Osorio ninian sobre uju kombustivel ba kareta sira ne’ebe ke la halo operasional ,” nia hatetetn.
