Koordenadora organizasaun Estrela Plus, Ines Sarmento, hateten atu garante direitu ema afetadu virus HIV/SIDA ba atendimentu saude, governu Timor –Leste tenke prepara medikus espesialista kona ba HIV/SIDA, nune’e bele fo tratamentu ba sira. 
Nia haktuir, durante ne’e afetadu sira lakon sira nia direitu ba tratamentu saude ne’ebe diak, tanba laiha medikus ne’ebe bele fo tratamentu no counseling ne’ebe diak ba sira sempre diskrimina sira iha parte hotu.
“Ami sujere atu bele hare ida ne’e liu –liu ba direitu ema afetado sira tanba ho esperensia ne’ebe iha real afetado sira lakon sira nia direitu,”Koordenadora Sarmento hateten, bainhira halo enkontru ho membru Konselho Nasional Kombate HIV/SIDA, iha Palasio do Governu, Dili.
Bainhira iha ona medikus espesial ba moras ida ne’e, nia dehan, bele ajuda pasiente sira hodi komprende diak liu tan sira nia kondisaun no bele halo prevensaun ba ema seluk.
Aleinde ne’e sira mos husu ba governu liu –liu Ministeriu Solidaridade Sosial atu fo apoia ruma ba afetado HIV/SIDA ne’ebe sei moris, tanba sira nia moris vulneravel tebes.
Hatan ba kestaun ida ne’e, Presidente Komisaun Nasional Kombate HIV/SIDA (CNCS), atual Vise Primeiru Ministru, Fernando Lasama de Araújo, konsidera hanoin sira ne’e no husu ba Ministerio Saude atu hare problema rekursu humanu liu –liu ba HIV/SIDA nian.
“Hau husu ba ministerio saude atu prepara medikus espesialista ho meus saida deit, halo kontratu ho medikus estranjeirus ruma ou seluk,” nia husu.
Iha fatin hanesan, Ministerio Saude, Sergio da Costa Lobo, hateten iha ona medikus balun ne’ebe treinadu atu fo atendimentu ba afetado HIV/SIDA sira.
“Kona ba medikus espesialista ita sei hare,” nia hateten.
