Parlamentu Nasional aprova $2,606 miloens Orsamentu Jeral Estadu (OJE) 2014 ba Sekretaria Estadu ba Promosaun Igualidade hodi kombate forma diskriminasaun hotu no violensia hasoru feto no promove partisipasaun feto ba prosesu dezenvolvementu nasional.
Sekretaria Estado ba Promosaun Igualidade (SEPI), Idelta Maria Rodrigues, hateten SEPI halo ona buat balun, hanesan halo advokasia ba linha ministeriu atu fo atensaun mos ba problema feto, maske seidauk masimu.
“Ami fahe osan ne’e $300 mil ba hakbi’it feto iha ekonomia, apoiu implementasaun planu asaun nasional violensia bazeia ba jeneru, $300 mil ba sosiedade sivil sira inklui sentru estudu jeneru UNTL no hare mos IV kongresu feto Timor –Leste nian,” SE Rodrigues hateten, iha Parlamentu Nasional.
Aleinde hakbi’it ekonomia feto, nia dehan, iha mos programa importante ida mak fo kapasidade ba distrital sira atu jere, liu –liu prepara feto sira iha municipio ne’ebe governu planeia atu implementa.
Nia hatutan, tinan ida ne’e mos SEPI sei halo kampania tama sai eskola no familias kona ba saude reprodutivu, hadomi vida tanba iha tinan kotuk feto foinsa’e barak mak oho an (tara an).
Orsamentu Jeral do estado ba SEPI iha tinan ida ne’e ho montante $2, 606 miloens no tinan kotuk ho $2,9 miloens konsege ezekuta hotu, liu –liu ba hakbi’it ekonomia grupu feto no kapasitasaun ba funsionarios inklui atividade seluk.
Entretantu Deputada Josefa Alvares Pereira Soares, husu ba SEPI atu hadia sistema supervizaun ba programa hakbi’it ekonomia feto, tanba programa ne’e durante ne’e laiha supervizaun husi SEPI.
“Ami la’os lakohi atu fo apoiu ba atividade ekonomia feto nian, maibe ami hakarak atividade sira ne’e tenke iha nia kontinuidade no sustentabilidade,” Deputada Soares hateten.
Iha fatin hanesan, Deputadu Paulo Moniz, husu mos ba SEPI atu kria atividade iha area rural hodi fo mos motivasaun ba feto sira iha area rural.
“Komemorasaun ne’ebe SEPI halo barak liu iha sidade Dili, ida ne’e mak feto rural ne’e ita la konsidera sira nia terus no la dezenvolve sira,” Deputadu Moniz sujere.
