Sekretaria Estado ba Promosaun Igualidade (SEPI) sei estabelese kriterio atu ta’es proposta hotu ne’ebe grupo feto sira hatama hodi asesu ba fundus transferensia publika tinan 2014. 
SE Idelta Maria Rodrigues, hateten SEPI estabelese kriteria ne’ebe rigorozu atu bele asegura nia ezekusaun hodi fo benefisiu ba ema hotu, tanba esperensia tinan hirak liu ba grupo balun naran iha, maibe la estabelese.
“Grupo tenke registu iha Ministerio Justisa, atividade tenke klaru, iha konta bankaria grupo nian no tenke iha akordu ho SEPI ba grupo foun sira,” SE Rodrigues hateten, iha salaun Maria Goreti, Kaikoli, Dili.
Tanba ne’e nia hateten, iha tinan ida ne’e SEPI sei la fo arbiru orsamentu ba grupo feto, maibe tenke preense criteria ne’ebe iha.
“Ami sei hare ema ne’ebe iha kapasidade atu hetan benefisiu husi osan ne’e,” nia hateten.
Nia hatutan, kriteria sira ne’e la’os atu hamate grupo feto sira iha baze, maibe fo korajen, atu hakbi’it an tanba tinan ida ne’e nia ezekusaun importante tebes, kada fulan tolu governu sei aprezenta ba Parlamentu Nasional kona ba ezekusaun orsamentu liu –liu atividade no programa.
Nia dehan, husi orsamentu SEPI nian 2014 ho total $1 miloens, $300 mil aloka hodi hakbi’it ekonomia grupo feto iha 13 distritus.
Entertantu, Diretora Ezekutivu Fundasaun Alola, Alzira Reis hateten katak criteria ne’e diak maibe difisil oituan ba grupo foun sira ne’ebe hakarak asesu ba fundus ne’e tanba registu iha ministerio justisa mos presiza tempu iha criteria barak mak tenke prense tan.
“Ba grupo sira ne’ebe foin kria difisil ba sira atu registu iha Ministerio Justisa tanba ne’e ami sujere uza mekanismu paralelu hanesan organizasaun ne’ebe registu ona bele parseiru ho grupos sira hodi implementa atividade,”nia sujere.
Iha fatin hanesan, reprezentante feto distritu Oe-Cusse, Merita de Jesus Marques apresia ho politika ne’e no husu SEPI atu fo mos anunsio to’o iha area remotas sira nune’e grupo hotu ne’ebe iha bele asesu ba fundus ne’e hodi hadia sira nia ekonomia familia.
“Ami iha distritu Oe-Cusse total grupo pursentu bo’ot tebes hanesan grupo produs kripik, fa’an mina rai, soru tais no human, maibe importante mak informasaun no koordenasaun ne’ebe diak atu ami bele benefisia husi orsan ne’e,” nia hateten.
