Membru Parlamentu Nasional kestiona maka’as kona ba servisu extensionista sira ne’ebe durante ne’e monta iha distritu sira hodi akompanha agrikultor sira, maibe sira nia servisu seidauk efetivu.
Deputadu Arao Noe, hateten governu hahu halo rekrutamentu ba extensionista sira desde tinan 2010 no iha 2011, maibe sira nia servisu la hatudu rezultadu diak.
“Hau hakarak kestiona ida ne’e, tanba iha suku balun hau tama mamuk to’o agora,” Deputadu Noe hateten, iha Parlamentu Nasional.
Deputadu husi bankada Congresu Nasional Rekonstrusaun de Timor (CNRT) ne’e,kestiona tanba Komisaun D (ekonomia no dezenvolvementu) iha sira nia relatoriu fiskalizasaun husu atu aumenta tan extensionista liu-liu iha distritu Ermera, maibe realidade servisu la la’o.
“Atividade mos laiha, sira konsentra iha distritu ka sub-distritu ita la hatene,” nia preokupa.
Nia dehan, se hakarak atu aumenta numeru extensionista, sira tenke halo servisu masimu, ajuda agrikultor sira.
“Hau mos uluk extensionista hotu ne’ebe uluk Indonesia nia tempu bolu PPL(Penyuluh Pertanian Lapangan) mais nia atividades ne’e ita hare, iha rezultadu diak,” Deputadu Noe dehan.
Preokupasaun hanesan mai husi Deputadu Leonel Marcal, no husu klarifikasaun ba iha komisaun D ne’ebe hakarak aumenta numeru extensionista, sementara sira nia servisu la la’o.
“Ita hare iha baze ,prezensa extensionista sira iha suku sira iha baze, sira abandona deit sira nia servisu,” Deputadu Marcal kritika.
Tanba ne’e nia sujere ba governu atu halakon extensionista iha sukus, tanba durante ne’e sira la hala’o sira nia servisu.
Enkuantu tuir Deputadu Estanislao da Silva, katak la presiza rekruta tan extensionista iha sukus, tanba durante ne’e laiha politika ne’ebe diak husi governu.
“Hau sujere ba Ministeriu Agrikultura atu mai iha parlamentu, tanba iha asuntu barak ita atu halo interpelasaun,” Deputadu da Silva sujere.
Razaun la presiza aumenta extensionista, nia dehan, tanba rai Timor ne’e ki’ik la hanesan ho rai sira seluk hanesan Amerika no Australia.
Hatan ba preokupasaun ne’e Prezidenti Komisaun D, Jacinta Abucau Pereira,katak komisaun rekomenda aumenta extensionista ba distritu Ermera , tanba iha sub-distritu Atsabe iha suku 12, maibe extensionista nain rua deit.
Nia dehan, potensilialidade ne’ebe mak sub-distritu Atsabe mak maioria hortikultura maibe extensionista sei menus atu halo akompanhamentu ba agrikultor sira.
“Ami hare katak extensionista iha sub-distritu ida ne’e la to’o, ne’e mak ami rekomenda atu bele aumenta,” nia hateten.
