Kazu oho malu iha aldeia Beto ne’ebe rezulta joven AHL mate, iha 01 Dezembru 2013, agora dadaun suspeitu ba kazu ne’e rasik tama ona prizaun preventive iha Becora.
Xefe Interino Servisu Investigasaun Crimanal (SIC), Inspektor Manuel Alves, hateten inisiu konsege kaptura ema nain 12, maibe husi sira nian hirak ne’e ida mak konsege sai hanesan suspeitu original lolos.
“Oras ne’e dadaun nia iha Becora kumpri hela prizaun preventive,” Inspector Alves, iha Kaikoli, Dili.
Suspeitu ho inisial SR oho vitima AHL, tanba problema pasadu, AHL mate kedas iha fatin wainhira suspeitu uja besi beton tau iha vitima nia kanuruk, hafoin mate tiha suspeitu soe vitima iha baleta kuak. Kazu ne’e akontese iha tuku hat madrugada.
Xefe interino hateten, suspeitu detein iha prizaun preventive, hodi hein prosesu julgamentu iha tribunal, tanba krimi ne’ebe suspeitu halo ne’e krimi todan ida.
Entretantu Deputada Josefa Alvares Soares, apresia ho servisu Polisia SIK nian hodi halo kapturasaun ba suspeitu sira ne’ebe agora sulan sira iha prizaun preventiva.
“Ne’e hatudu duni katak PNTL esforsu duni no hetan kolaborasaun servisu diak ho komunidade,” Deputada Soares apresia.
Tanba ne’e, nia husu ba governu presiza kapasita PNTL ho fasilidades ne’ebe sufsiente atu dezempenha sira nia servisu.
Enkuantu komunidade Beto Timur, Manuel da Costa, hateten atuasaun polisia ne’ebe lalais hetan suspeitu ne’e, halo joven sira no ema sira ne’ebe hakarak halo krimi ne’e senti tauk atu halo tan krimi iha future.
