Membru Parlamentu Nasional kestiona konstruksaun dormitoriu Polisia Nasional Timor-Leste distritu Aileu ne’ebe to’o agora seidauk hala’o maske tama ona iha planu.
Membru Komisaun B (seguransa, defeza no negosiu estranjeirus), Deputadu Cesar Valente de Jesus, husu atu iha klarifikasaun ne’ebe profundu, tanba tama ona planu.
“Razaun tanba saida maka iha Aileu seidauk halo, Komisaun B sei tun ba hare iha baze,” Deputadu de Jesus kestiona, iha Parlamentu Nasional.
Nia proekupa, tanba membrus PNTL tenke hetan tratamentu ne’ebe adekuadu, ho nune’e sira bele servisu ho professional liu tan. “Sira sente hakmatek wainhira hala’o servisu,”.
Hatan ba preokupasaun hirak ne’e, Sekretariu Estadu Seguransa (SES), Francisco Guterres hateten, konstrusaun ba dormitoriu PNTL distritu Aileu agora dadaun tama ona prosesu tenderizasaun.
“Maibe ami halo ona iha distritu tolu; iha distritu Oe-Cusse la’o diak, distritu Manufahi no distritu Liquisa mos la’o hela,” SE Guterres hateten.
Nia dehan, husi Orsamentu Jeral Estadu ba tinan 2014 husu hodi aumenta tan orsamentu, nune’e bele finalize konstrusaun uma sira ne’e.
