Membru Parlamentu Nasional ejiji ba Ministeriu Saude (MS) no Ministeriu Komersio Industria no Meiu Ambiente atu fiskaliza no kontrola sasan nesesidade baziku sira iha supermerkadu, tanba loja balun sei fa’an sasan liu prazu.
Deputada Virginia Ana Belo, hateten importante tebes atu hala’o programa ida ne’e ho rutina, hodi asegura kualidade hahan no la fo impaktu ba ema nia saude bainhira konsumu.
“Liu –liu Ministerio Saude, ita hare sasan barak tebes iha tinan kotuk to’o agora distribui iha loja sira ne’e expire hotu ona, ami hetan barak tebes,” Deputada Ana Belo hateten, iha Parlamentu Nasional.
Entretantu Xefe Departamentu Saude Ambiental no Vijilansia Sanitaria Ministeriu Saude, Tomasia de Sousa, hateten kada fulan ekipa ministeriu nian halo kontrola ba nesesidade baziku sira iha supermerkadu ne’ebe la saudavel ona ba komunidade sira atu konsumu.
Tanba nia dehan, papel setor saude nian mak eduka no hasa’e komprensaun empregador sira nian kona ba impaktu hahan ne’ebe la saudavel, liu-liu sasan ne’ebe liu ona prazu.
“Komunidade sira bele hetan moras hanesan diarea no lanu bainhira konsume hahan ne’ebe liu prazu tanba hahan sira ne’e uja kimiku,” nia dehan.
Kona ba fo sansaun ba lojas ne’ebe fa’an sasan ne’ebe liu prazu, nia dehan, ne’e kompetensia Ministeriu Komersio Industria no Meiu Ambiente nian.
Nia informa, katak sira identifika duni iha empregador balun mak sei kontinua fa’an hahan ne’ebe liu ona prazu hanesan susu been, biskuit, ikan lata no hahan kemasan seluk tan.
