Membru Parlamentu Nasional preokupa tebes ba universitariu privadu balun ne’ebe loke ona nia paralelo iha distritus, tanba eskola sira ne’e laiha kualidade diak.
Deputadu Aurelio Freitas Ribeiro, preokupa tanba universitariu ne’ebe loke eskola paralelo iha distritu ne’e hetan ona akreditasaun, maibe laiha kondisaun.
“Dosente laiha, meja kadeira laiha, maibe sira hetan graduasaun,” Deputadu Aurelio Freitas Ribeiro kestiona, iha Parlamentu Nasional.
Tanba tuir nia, atu hetan rezultadu (estudantes ho kualidade) ne’ebe diak, eskola tenke kria kondisoens inklui dosentes sufsiente hanorin ho rutina no karteiras iha sala de aulas.
Deputadu husi bankada Fretilin ne’e, hateten universitariu mak fatin atu produs ema matenek ho kualidade, nune’e bele fo atendementu ba povu.
“Maibe realidade universidade privadu balun ne’ebe loke paralelo iha disritu laiha kondisaun ne’ebe diak atu estudantes sir abele estuda ho diak,” Deputadu Ribeiro hateten.
Entretantu Deputada Angelica da Costa, sente preokupa oituan tanba eskola privadu nia kualidade diak liu fali eskola publiku nian.
Nia dehan, hahu husi primeiru governu to’o mai kintu governu, profesor hotu-hotu tuir treinamentu oi-oin kona ba pedagojiku, maibe eskola privadu mak kualidade diak liu.
“Kona ba eskola publiku hau sujere deit ba senhor ministru, tenke kontrolu ne’ebe mak diak,” Deputadu da Costa sujere.
Hatan ba preokupasaun ne’e Ministru Edukasaun (ME), Bendito Freitas, katak kona ba klase paralelo ministeriu mos hola ona nota atu tau medidas seriu ba eskola sira ne’e.
“Ami rasik mos halo ona diskusaun teknika iha nivel ministeriu,aponta tiha ona dadus ne’ebe ke iha tiha ona klase paralelos,” Ministru Freitas hateten.
Ministru hateten, universidade privadu sira ne’ebe loke klase paralelo iha distritus mak UNPAZ loke nia klase paralelo iha distritu Liquisa, Maliana, Same, Ermera no distritu Oe-Cusse, Institutu Superior Kristal (ISC) loke nia klase paralelo iha Maliana ,Same,Baucau,Oe-Cusse, Viqueque, Lospalos no Aileu.
Enkuantu Institutu Of Bussines (IOB) loke paralelo iha Maliana, Ermera no Baucau, Dili Institute Of Tecnology (DIT) iha Baucau, Universidade Dili (UNDIL) iha Baucau,Viqueque,Manatuto noLospalos ,Universidade Nasional Oriental (UNITAL) foin mak iha Baucau.
Medidas ne’ebe ME sei hola mak, nia dehan, oinsa mak rekursu humanus Timor-Leste sai kualidade iha futuru.
“Ami iha ona preparasaun teknika atu bele reuniaun ho respetivus instituisoens reitor sira atu bele koordena, hola medidas nesesariu ba kestaun ne’e,” Ministru Edukasaun ne’e dehan.
