Sekretariu Estadu Industria no Kooperativas (SEIK), Filipus Nino Pereira, hateten ho Orsamentu Jeral Estadu (OJE) 2014 nian sei hadia armajen Bebora, tanba kondisaun armajen refere dodok ona. 
SE Preira, hateten armajen ne’e tenki hadia nune’e bele tau produtu lokal sira ne’ebe governu sosa husi komunidade sira, hanesan koto no fos sira ne’ebe rai labele at.
“Ami mos sei hare kona ba seguransa ninian, tanba armajen iha Bebora ita rona katak ema naok , ne’ebe ita sei hare,” SE Pereira hateten.
Entretantu Deputadu Manuel Gaspar, dehan la presiza halo tan armajen, tanba produsaun husi agrikultor sira seidauk efisiensia.
Tuir nia, ida ne’e akontese tanba ministeriu kompetente sei fraku. “Iha faktu konkretu, ita hare fatin barak trator sira ne’ebe mak fahe iha tinan rua tolu ba kotuk ne’e, fahe trator la ekilibru, tanba fahe fali ba fatin sira ne’ebe mak la devia atu fahe trator,” Deputadu Gaspar kestiona.
Nia observa durante ne’e ba servisu Ministeriu Agrikultura no Peskas (MAP), katak fahe trator barak mak fahe ba ema ne’ebe hela iha foho leten.
“Mesmo ita prepara armajen ida ne’ebe diak, maibe planu Ministeriu Agrikultura nian la efisiensia hasa’e produsaun, hanesan deit,”nia dehan.
Iha fatin hanesan Deputadu Domingos Carvalho de Araujo, hateten produtu lokal husi distritu Aileu, kareta sempre ba tula lori kedas mai iha nasional, tanba armajen iha distritu laiha.
“Ba futuru ita tenke halo armajen iha distritu sira hodi tau produtu local,” Deputadu husi bankada CNRT ne’e hateten.
Kona ba rehabilitasaun armajen Bebora, nia hateten, iha orsamentu 2014 ne’e la preve, maibe tama iha projetu emerjensia ninian.
“Se hakarak kondisaun ne’ebe mak diak tenke hadia janela no odamatan sira ne’e para naokten sira labele tama,” nia sujere.
