Ministeriu Obras Publik (MOP) iha ona planu atu implementa sistema pra-kualifikasaun ba kompania nasional no internasional ne’ebe ezekuta projetu iha rai laran.
Sekretariu Estadu Obras Publiku (SEOP), Luis Vaz Rodrigues, esplika katak pra- kualifikasaun hanesan sistema ida ne’ebe nia papel hare kompania sira nia funsionamentu.
“Pur ezemplu kompania ne’e nia fatin iha ne’ebe, fasilidade iha ga la’e atu halo obra no osan iha banku ne’e hira,” SE Rodrigues hateten, iha Mandarin, Dili.
Nia rekonese, katak sistema pra-kualifikasaun ne’e planu kleur ona, maibe foin maka atu realize, sistema ne’e mos sei involve Laboratorium Nasional atu hala’o testu ba material no halo mos fiskalizasaun iha terenu.
“Tenke tuir prosesu laboratorium, laboratorium mak tenke iha data base, bazea ba data base ne’e mak konsultan sei halo dezenu,” SE Rodrigues hateten.
Enkuantu Diretor Laboratorium Nasional (LabNas), Saturnino Gomes, hateten durante ne’e iha kompania balun halo duni testu material iha laboratorium, maibe balun la’e.
Maibe nia dehan, ho sistema pra-kualifikasaun ne’e bele regula kompania hotu-hotu obrigatoriumente halo testu iha LabNas, nune’e organizadu no bele hatene obra nia kualidade.
“Hanesan iha Australia, Laboratorium Nasional ne’e nia papel importante tebes atu determina obra ida nia kualidade no involvementu laboratorium ne’e masimu,” Diretor Gomes hateten.
Iha fatin seluk Prezidente Komisaun E (infra-estrutura, transporte no komunikasaun), Deputadu Pedro da Costa, hateten iha Orsamentu Jeral do Estadu (OJE) 2014, husu atu tau osan hodi hadia didiak laboratorium MOP nian ne’e, nune’e bele garante kualidade servisu no fasilidades.
