Jogador Timor-Leste tanis iha ema nia rain tanba farda laiha no ida ne’e akontese tanba laiha tratamentu ne’ebe diak husi Federasaun Futebol Timor-Leste (FFTL) ba jogador sira.
“Ami tanis ba farda no sutera, farda ne’ebe ami uja ne’e ami taka numeru um iha kotuk ho isolasi deit, maibe bainhira ema tiru, isolasi ho numeru semo sai hotu,” Vise Prezidente Amante Futebol Timor-Leste, Domingos Belo Ximenes hateten, iha konferensia imprensa, iha salaun Asosiasaun HAK, Farol, Dili.
Nia hateten, seidauk iha jogador iha mundu tanis ba farda no sutera iha ema nia rain, so uniku jogador Timor-Leste mak halo ida ne’e.
“Timor-Leste nia jogador mak ba joga toba iha aero portu laran no laiha tratamentu ho kondisaun ne’ebe dignu,” nia lamenta.
Tanba ne’e nia sujere, tenke halo remodelasaun ba estrutura federasaun FFTL nian, tanba estrutura agora nia servisu ladiak, la tau matan ba jogador sira.
Nia mos husu ba Parlamentu Nasional no Tribunal das Kontas atu halo auditoria ba jestaun finansas FFTL atual.
Entretantu jogador Miro Valdo Pinto, husu ba estadu no governu tenke kria kondisaun ba jogador sira, tanba sira mos iha familia.
“Ita hare jogador sira lori ita nia nasaun ba joga iha liur, maibe fila mai ba dulas fali volante sai kondutor no balun ba mete fali festa , hemu tua iha dalan,” nia dehan.
Nia dehan, ida ne’e la’os kulpa jogador sira nian, maibe federasaun FFTL mak la tau atensaun ba iha jogadores.
“Sira selu jogador diak,jogador sira mos hatene an, la ba mete no lakohi ba hemu tua,” nia dehan.
Nia mos husu estadu no govenru atu kria asrama ba jogador sira, nune’e sira bele konsentra ba sira nia treinu nudar jogador, no fasil atu organiza malu bainhira iha eventu ruma.
Iha fatin hanesan Jose Carvalho, Prezidente Amante, hateten imajen nasaun Timor-Leste iha jogador sira nia liman, la’os iha FIFA nia liman.
“Ita Timor oan hotu-hotu iha direitu atu hatene no halo los buat ne’ebe durante ne’e sira halo la los,” nia hateten.
Iha konsensus FIFA nian, hateten nasaun ida atu tama ba membru FIFA nia tenke priense kriterias,kriteria saida,iha tenke iha kompetisaun no iha fasilidade.
“Ita esforsu an atu tama iha membru FIFA, maibe ita laiha fasilidades no laiha kompetisaun,” nia hateten.
