Polisia Nasional Timor –Leste (PNTL) sei monta postu Unidade Polisia Fronteira (UPF) iha suku Lelobata, Batugade, sub-distritu Balibo, distritu Bobonaro, nune’e bele kontrola ema tama sai ho ilegal iha fatin ne’eba.
Komandante Jeral PNTL, Komisariu Longuinhos Monteiro, hateten iha fulan Dezembru tinan kotuk (2013) ema deskonesido tama ho illegalmente no estraga markasaun entreTimor Leste ho Indonezia iha fatin ne’eba.
Ho razaun ida ne’e mak nia dehan, presiza duni monta postu polisia UPF nian rua ga tolu iha fronteira.
“Liu-liu iha area Lelobata ninian ida no ida iha Naktuka,” Komisariu Monteiro hateten, iha Kaikoli, Dili.
Nia reforsa, katak planu monta postu hirak ne’e sei realize iha tempu badak, agora dadaun tama ona iha faze preparasaun.
“Tanba ne’e ita presiza kapasita polisia UPF sira no fo bens de servisu ba sira, atu nune’e sira bele servisu ho diak,” nia hateten.
Iha parte seluk membru Komisaun B (seguransa, defeza, negosiu estranjeiru), Deputada Maria Lurder Bessa, konsidera ne’e planu ne’ebe diak no nesesidade duni.
“Tanba ita hotu hatene katak problema iha fronteira ne’e bebeik hela deit,” Deputada Bessa hateten.
Maibe nia mos husu ba komando jeral PNTL atu reforsa tan rekursu humanu iha parte fronteira nian inklui fasilidades hanesan radio komunikasaun no transporte ba polisia UPF.
“Komisaun B uluk halo duni fiskalizaun ba iha ne’eba, iha momentu ne’eba dehan kedas katak tenke aumenta tan polisia UPF,” nia dehan.
