Membru Parlamentu Nasional rekomenda ba Ministerio Saude atu halo intervensaun ba problema HIV/SIDA ne’ebe dadaun ne’e da’et maka’as, fo ameasas bo’ot ba populasaun Timor –Leste tomak. 
Membru Komisaun F (saude, edukasaun, igualidade, veteranus no kultura), Deputada Ilda Maria da Conçeicão, husu governu atu fo atensaun ne’ebe seriu ba prevensaun virus ida ne’e, tanba husi numeru ne’ebe registu iha afetadu balun mak sei livre hela no la halo tratamentu iha fasilidade saude.
“Ne’e problema seriu, tanba ita rai ida ki’ik ho populasaun ne’ebe miliaun ida resin deit, se ita la tau atensaun seriu mak la to’o tinan 20 jerasaun Timor –Leste sei mohu,” Deputada Ilda Maria preokupa, iha Parlamentu Nasional.
Prekoupasaun hanesan hato’o mos husi Deputadu Francisco Miranda Branco, katak numeru afetadu virus hamate ne’e kada tinan aumenta, e Ministerio Saude tenke iha linha kordenasaun ho sosiedade sivil sira atu transforma informasaun prevensaun ba komunidade sira.
“Hau hanoin ida ne’e presiza fo atensaun, tanba numeru kazu HIV/SIDA iha rai laran kada tinan kontinua aumenta,” Deputadu Branco hateten.
Enkuantu tuir dadus Ministerio Saude nian iha tinan 2003-2013 numeru afetadu virus HIV/SIDA hamutuk ema nain 355. Husi numeru ne’e iha ema nian 39 mak mate ona no iha nain 129 tuir hela tratamentu Anti Retro Virais iha fasilidade saude, seluk sei livre hela.
