Membru Parlamentu Nasional, Deputada Ilda Maria da Conçeicão husu ba sosiedade sivil sira atu halo peskiza klean hodi identifika lolos kauza principal husi kazu insestu ne’ebe dadaun ne’e buras iha rai laran, nune’e governu bele halo intervensaun.
Membru Grupu Feto Parlamentar (GMPTL) ne’e hateten, durante ne’e nia rona duni kona ba kazu insestu ne’e, maibe la hatene kauza lolos husi kazu ne’e, entaun defisil halo intervensaun.
“Lolos ne’e tenke iha estudu ida atu hare tan saida mak buat sira ne’e mosu, nune’e fo hanoin ba governu atu bele aranja kondisoens hodi prevene,” Deputada husi bankada Fretilin ne’e hateten, iha Parlamentu Nasional.
Entretantu, Koordenadora Advokasia Forum Komunikasaun Feto Timor –Leste (FOKUPERS), Honoria Lopes, hateten sira seidauk halo peskiza espesifiku ba kauza kazu insestu, maibe sira halo ona peskiza kona ba kauza principal mosu violensia domestika.
“Ami seidauk iha planu atu halo peskiza kona ba kauza mosu violensia seksual no insestu,” nia dehan.
Maske nune’e nia dehan, bazeia ba informasaun husi vitimas no tuir situasaun real ne’ebe iha, katak kauza principal mak poder mane nian as liu iha uma laran, sira bele halo buat hotu ba membru familia ne’ebe hela hamutuk iha uma laran inklui mos oan feto rasik.
Iha parte seluk, Koordenadora Uma Mahon FOKUPERS, Judit R. da Conçeicão, hateten iha tinan 2013 sira simu vitima insestu hamutuk ema nain 37 e dadaun ne’e hela iha uma mahon, tanba iha balun gravidas, oan nurak no suspeitu sei livre hela.
Bazeia ba dadus ne’ebe orgaizasaun iha espesifiku ba kazu insestu hahu tinan 2007-2013 iha kazu hamutuk 85, husi numeru ne’e kazu balun hetan ona finalidade husi tribunal.
