Koordenadora Uma Mahon Forum Komunikasaun Feto Timor –Leste (FOKUPERS), Judit R. da Conceição, hateten vitimas violensia domestika balun ne’ebe hela iha uma mahon ne’e hetan asaltu husi autor no familia autor sira, bainhira fasilita sira ba prosesu formal.
Koordenadora Uma Mahon FOKUPERS ne’e dehan, ida ne’e akontese tanba durante ne’e laiha seguransa ba iha vitima sira iha uma mahon ne’e.
Tanba ne’e nia hateten, ho akontesementu ida ne’e fo amesasa bo’ot ba iha servisu pesoal iha uma mahon sira, sira sei sente tauk no trauma bainhira akompanha vitima sira.
“Ami fo fatin seguru no asistensia ba vitima, maibe ami rasik sente la seguru tanba autor balun mai ho atetude brutal,” nia hateten, iha Dili.
Kona ba argumentu husi individu balun ne’ebe hateten, katak FOKUPERS organizasaun ne’ebe gosta fahe ema nia familia, Koordenadora ne’e dehan, ne’e la los tanba FOKUPERS iha atu proteje no supporta feto vulneravel sira hodi hetan sira nia direitu ne’ebe justu.
“Ami esforsu maka’as atu vitima sira bele fila ba sira nia la’en ga familia, ami la taka dalan,familia buka solusaun bainhira vitima hakarak fila, maibe kazu krime tenke ba oin tuir prosesu legal,” nia dehan.
Nia informa, vitima violensia domestika ne’ebe oras ne’e dadaun hela iha uma mahon FOKUPERS hamutuk 212, kompostu husi labarik minoridade no adultu inklui mos vitima insestu balun ne’ebe hela iha uma mahon hahu tinan 2010, tanba autor sei livre.
Iha parte seluk, membru Grupu Feto Parlamentar, Deputada Ilda Maria da Conçeicão, rekonese katak iha duni risku bo’ot ba servisu pesoal asistensia vitima violensia bazeia ba jeneru.
Nia dehan, iha Orsamentu Jeral do Estado 2012, grupu feto parlamentar tau ona orsamentu hodi hare ba kestaun ne’e.
“Iha orsamentu ida fo ba Polisia Nasional sira atu sosa kareta hodi fo seguransa ba vitima violasaun sira, maibe ikus fali ami hare katak kareta sira ne’e la uja hodi fo seguransa ba vitima sira uja fali ba buat seluk,”Deputada ne’e dehan.
Nia hatutan , nudar orgaun fiskalizador sira sei buka tuir paradeiru kareta sira ne’e nian tanba pesoal asistensia ba vitima violasaun sira ne’e risku tebes no presiza seguransa.
