Membru Parlamentu Nasional, Deputada Josefa Alvares Pereira Soares, hateten uma millennium development goal (MDG) ne’ebe governu harii ba ema vulneravel iha rai laran, barak mak abandona tanba laiha kondisaun.
Tanba ne’e nia husu responsabilidade ba kompania BTK ne’ebe kaer projetu ne’e, tenke halo tuir regras ne’ebe iha, tanba orsamentu barak mak fakar ba projetu ne’e.
“Kuaze projetu uma MDG ne’ebe halo iha distritus laiha kualidade, uma sira ne’e nia kakuluk komesa at ona, laiha bee moos, eletrisidade, no sintina mos laiha,” Deputada Soares kestiona, iha Parlamentu Nasional.
Deputada husi bankada Fretilin ne’e lamenta, tanba governu kontinua fo projetu bo’ot sira ba kompania ne’e, maske hatene ona katak kompania ne’e halo projetu laiha kualidade.
“BTK halo la diak mos, BTK hela deit, saida mak iha kotuk keta vantajen ruma karik,” nia diskunfia.
Nia espera katak, iha tinan 2014 atu governu hare no analiza didiak kompania sira hodi jere projetu sira, tanba gasta orsamentu bo’ot no tenke benefisia povu kbi’it la’e k sira.
Preokupasoens hanesan hato’o husi Deputada Albina Marçal Freitas, katak governu esntrega xavi ba benefisiariu sira, maibe sira la hela tanba laiha kondisaun.
“Sira balun hela duni, maibe hela la metin tanba laiha bee moos, eletrisidade inklui haris fatin laiha,” Deputada husi bankada CNRT ne’e hateten.
Hatan ba kestaun ne’e, Ministra Solidaridade Sosial (MSS), Isabel Amaral Guterres, katak nia parte seidauk rona benefisiariu abandona uma MDG, tanba hafoin konstrusaun remata, governu entrega kedas ba iha benefisiariu sira ne’ebe identifika husi xefe do suku sira.
“Hau labele komentar barak, tanba tuir hau hatene uma MDG ema hela hotu ba,” Ministra Guterres hateten.
