Mana nain gender award, Emelita Guterres sujere ba Sekretaria Estadu ba Promosaun Igualidade (SEPI) atu estabelese fatin krese ( fatin tau oan sira bainhira servisu hela) iha instituisaun governu inklui instituisaun privadu sira.
Razaun tau fatin krese iha instituisaun sira tantu governu no privadu, nia dehan, tanba dalabarak inan sira araska buka ema hodi hein sira nia oan, liu-liu inan ne’ebe oan sei nurak (depois de fulan tolu).
Nia hateten, fatin krese fasilita tebes inan feto sira atu hala’o servisu nudar empregada, sira la abandona oan,maibe sira iha oportunidade atu fo susu sira nia oan.
Tuir nia, ohin loron feto barak mak sai dezempregada, tanba ema atu hein oan laiha.
“Se karik SEPI bele promove ida ne’e hahu to’ok iha ministeriu ida, se ministeriu hot-hotu halo esforsu ida ne’e; hau fiar katak feto barak sei involve an iha servisu tantu funsionario publiku no emprezario,” manan nain gender award, Guterres dehan, iha Dili.
Nia dehan, kuandu instituisaun hotu dezenvolve hanoin ida ne’e, feto sira bele ezerse sira nia direitu hodi halo buat ruma ba sira nia moris no labarik mos hetan sira nia direitu hetan susu been inan nian.
Entretantu, Prezidente Grupu Feto Parlamentar (GMPTL), Josefa Alvares Soares, konkorda ho ideas ida ne’e, tanba iha nasaun seluk hanesan Angola iha instituisaun privadu inklui mos governu kria fatin krese hodi tau labarik sira, nune’e inan sira bele focus ba servisu.
“Ne’e hanoin diak ida, atu fasilita inan sira hala’o sira nia servisu nudar empregadora ho diak lilu tan, maibe depende ba governu,prioridade duni ga lae, tanba nudar nasaun foun iha prioridades barak,” Deputada Soares hateten.
Karik dezenvolve duni iha future, nia dehan, presiza hare mos ba iha bensimentu ne’ebe feto sira hetan kada fulan, tanba krese ne’e la’os gratuita maibe selu hodi asegura fasilidade no rekursu humanus.
Tuir observasaun TDW iha treinu, hatudu katak organizasaun sosiedade sivil balun hanesan Fundasaun Alola, Forum Komunikasi Perempuan Timor Lorosa’e (FOKUPERS) estabelese ona fatin krese.
Fatin krese ne’e ho objetivu, fasilita inan feto sira ne’ebe empregada, alem de servisu sira mos la viola oan sira nia direitu atu asesu ba susu been inan nian.
