Diretor organizasaun Search For Common Ground (SFCG), Jose Francisco de Sousa husu ba joventude sira iha teritorio tomak atu rona programa babadok rabenta iha knal radio komunidade hotu, tanba programa ne’e koalia espesifiku ba problema joventude nian. 
Nia dehan, programa ne’e koalia kona ba isu espesifiku sira ne’ebe afeita ba moris jovens nian, hanesan politika governu nian atu fo atensaun ba estudante feto sira ne’ebe isin rua durante sei eskola, dezempregu intelektual, korupsaun, alternative seluk bainhira taka artemasiais, problema trabalhador sira iha estrangeirus no seluk tan.
Nia hatutan, asuntu hirak ne’e identifika husi joventude sira iha diskusaun forum nasional joventude ne’ebe realize iha fulan hirak liu ba, sira hakarak hatene klean liu tan kona ba politika governu ba problema jovens nian no oinsa atu kontribui ba prosesu dezenvolvimentu no harii paz iha rai laran.
Nia dehan, iha programa babadok rabenta ne’e jovens mos hato’o sira nia perspetiva no governu responde kedas sira nia perspetiva ne’ebe sira hato’o.
“Tenke rona, la’os tur hein kritika deit, nune’e imi bele hatene saida mak imi bele halo kontribui ba dezenvolvementu,” Diretor SFCG, de Sousa apela iha serimonia lansamentu programa babadok rebenta.
Nia dehan, programa ida ne’e hahu kedas iha tinan 2010, ho objetivu uja meus komunikasaun atu joven sira bele espresa sira nia opiniaun hodi kontribui ba prosesu harii dame iha rai laran.
Entretantu Acting Mission Director USAID, Sandra Minkel, nudar doador sente orgulhu bele apoia programa ne’e, ajuda joventude sira iha Timor-Leste tanba programa ne’e koalia liu kona ba mensagen harii dame no paz ba komunidade sira hotu liu –liu joventude sira.
Nia hatutan, involvimentu joven sira nian importante tebes hodi buka solusaun ba problemas ne’ebe afeta ba sira nia moris, hanesan asesu ba edukasaun ne’ebe diak, hetan servisu ne’ebe diak no mantein.
“Importante, oinsa mak bele kria espasu ida hodi hakbi’it joven sira liu husi involve sira iha dialogu, diskusaun nune’e sira bele koalia sai isu ne’ebe sira infrenta ba malu no ba lideransa sira hodi buka solusaun,” Minkel dehan.
Tuir informasaun, programa ne’ebe ho 24 episode ne’e sei transmite liu husi knal radio komunidade sira iha 13 distritus, semana ida dala ida tuir kalendario kada estasaun radio sira nian.
