Servisu Agua no Saneamentu (SAS) hahu kanaliza ona bee moos ba iha komunidade sira iha area rural, ho apoiu orsamentu husi governu Australia $80 milioens ba iha Sekretariu Estadu Agua no Saneamentu.
Sekretariu Estadu Elias Pereira Moniz, hateten orsamentu sira ne’e agara dadaun uja duni no kanaliza ona bee mos iha area rural.
“Komesa kanaliza ona bee iha area rural iha distritu 13, uluk AusAid monta ona, maibe karik at fali ona, entaun sira halo fali deit manutensaun,” SE Moniz hateten , iha Dili.
Nia dehan, tuir lolos bee iha area rural ne’e entrega fila fali ba komunidade hodi halo operasaun manutensaun.
“Maibe tanba hare ba ekonomia komunidade seidauk normal, entaun AusAid suporta orsamentu hirak ne’e hodi bele fasilita normalize fali bee iha area rural,” nia dehan.
Tanba ne’e nia apela ba komunidades, karik hetan ona bee moos, tenke iha responsabilidade hodi asegura bee ho seriadade, nune’e bele dura iha tempu naruk.
“Labele estraga, presiza mos proteze, atu ne’e bele ajuda,” nia apela.
Iha parte seluk Deputadu Inacio Moreira, hateten bee moos nudar nesesidade baziku neb’ee maka governu tenke toma atensaun.
“Sistema ne’e mak presiza hare didiak, tanba oras ne’e dadaun dala ruma balun hetan ona bee moos, maibe balun la hetan fali, ne’e problema ida,” Deputadu Moreira hateten.
Nia espera katak, ho apoia orsamentu ne’ebe iha, atu jere didiak tuir planu ne’ebe iha, nune’e osan sira ne’e iha valor.
Entretantu komunidade Beto, Mateus de Jesus, kritika katak maske kada tinan Parlamentu aprova orsamentu ba bee moos nian, maibe povu kontinua halerik ba bee moos.
“Hanesan iha Beto dala ruma loron tolu mak bee mai dala ida,” nia dehan.
