Organizasaun Judicial System Monitoring Program (JSMP) sujere atu fo mos seguransa ba iha ofisiais justisa sira, liu-liu bainhira hala’o servisu iha komunidades nia le’et.
Diretor Ezekutivu JSMP, Luis de Oliveira Sampaio, hateten servisu ofisiais justisa sira, ne’e kategoria servisu ne’ebe iha nia risku bo’ot.
“Sira mak ezekuta mandate tribunal nian, entaun sira mos hetan risku ameasa seriu ba sira nia vida,” Diretor JSMP, Sampaio dehan, iha Colmera, Dili.
Nia dehan, durante ne’e ofisiais justisa sira laiha koordenasaun no protesaun ba sira bainhira hala’o funsaun iha komunidade nia le’et.
Tanba tuir nia, ofisiais sira lori notifikasaun ba iha suspeitu ne’ebe halo krimi, tanba ne’e sira presiza hetan protesaun.
Iha fatin seluk Juis Administrador Tribunal Distrital Dili, Duarte Tilman, konsidera ne’e hanoin ne’ebe diak, maibe presiza tempu atu responde buat sira ne’e hotu.
“Ne’e prosesu ne’ebe naruk, Ita presiza hare didiak, faze pur faze atu bele hadia buat sira ne’e,” Juis Tilman hateten.
Iha parte seluk Deputadu Cesar Valente de Jesus, konkorda no kada ofisiais presiza duni hetan protesaun intermus de seguransa.
“Liu-liu bainhira nia hala’o nia servisu iha baze, hasoru komunidades lori notifikasaun,” Deputadu de Jesus hateten.
