Vise Primeiru Ministru (VPM), Fernando Lasama de Araújo, konvoka enkontru urgent ho dirigente Ospital Nasional Guido Valadares, kona ba problema faltas aimoruk no fasilidades seluk iha ospital, hodi buka solusaun.
Vise Lasama hateten, enkontru urgente ne’e ho objetivu atu rona direitamente husi sira kona ba lamentasoens husi publiku kona ba atendementu ne’ebe ladun efetivu, tanba menus aimoruk.
“Diretor sira tenke sai parte ba solusaun, fera ulun haka’as an hare situasaun, se aimoruk laiha tenke haka’as an oinsa para iha aimoruk, ita iha osan atu sosa aimoruk,” Vise PM Lasama dehan, bainhira halo enkontru ho dirigente sira iha HNGV, Bidau, Dili.
Tanba ne’e nia husu tan dala ida ba Ministeriu Saude no diretor sira iha HNGV atu buka solusaun hodi resolve problema sira ne’ebe iha liu –liu kona ba aimoruk no fasilidade sira atu fo atendementu ba pasiente sira.
Nia rekonese katak, setor saude no edukasaun iha problema barak, tanba ne’e dirijente sira tenke fera ulun, haka’as an buka solusaun hodi resolve problema sira ne’e tanba saude relasiona ho ema nia vida no edukasaun ema nia futuru.
Iha enkontru ne’e pesoal saude husi departamentu ida –idak hato’o problemas ne’ebe sira hasoru hodi prejudika sira nia atendementu hanesan falta aimoruk, fasilidade medikus, falta consomoves (laiha luvas).
Alem de ne’e pesoal saude sira mos lamenta ho sira nia overtime ne’ebe to’o agora Ministeriu Saude seidauk halo pagamentu, implementasaun regime kareira ne’ebe hamosu diskriminasaun ba pesoal saude sira hanesan emfermeirus no medikus inklui mos cleaner sira iha HNGV ne’ebe sei sai problema.
Entretantu Vise Ministru Saude, Maria do Céu Sarmento Pina da Costa, rekonese katak overtime sei sai problema bo’ot iha HNGV no fasilidade sira seluk, tanba lei regime kareira iha konfusaun oituan ba intrepretasaun lei ne’e.
“Presiza halo diskusaun fali,” Vise do Céu dehan.
Maibe nia promote, iha fulan Dezembru tinan ida ne’e sei resolve problema overtime sira iha fasilidade saude hotu, no husu ba pesoal saude sira atu pasensia oituan hodi hein prosesu.
“Ami tenta resolve problema overtime sira ne’e iha fulan Dezembru, para tama tinan 2014 ita la’o los ona ho intrepretasaun ultimu husi lei ne’ebe ita iha,” do Céu katak.
Enkuantu kona ba aimoruk no fasilidades, nia dehan iha ona prosesu kompras no aimoruk balun kompania hatama dadaun ona mai.
Iha okaziaun ne’e mos Vise Primeiru Ministru promote, katak sei konvoka diskusaun ida entre MS ho Komisaun Funsaun Publika atu hare ba dekretu lei kona ba regime kareira, nune’e labele fo komplikasaun ba pesoal saude sira.
