Polisia Nasional Tranzito (POLTRANS) sosializa sinais tranzito ne’ebe monta iha linha zebra cross ba komunidades no motorist sira, ho intensaun atu suporta ema la’o ain sira, atu hakat ou la’o ho seguru.
Komandante Nasional Tranzito (POLTRANS), Inspector Xefe Antonio L.C. Soares, hateten polisia tranzito iha dever atu fo sosializasaun kona ba sinais tranzito ne’ebe monta iha kedas linha zebra cross, tanba komunidade balun la komprende.
Lampu tranzito iha funsaun rua, ida prepara ba kareta ho motor, no ida fali prepara ba ema la’o ain sira.
“Lampu verde ba kareta no motor sira no lampu mean ba ema la’o ain sira. Ne’ebe kuandu lampu mean iha linha zebra cross, ne’e katak ema la’o ain labele ultra pasa,” Komandante Soares esplika, iha Kaikoli, Dili.
Nia dehan, sosializasaun ne’e hahu desde dia 04/10/2013, hahu hala’o iha Palasio Governu nia oin, no sei kontinua iha fatin seluk.
Entretantu Deputadu Mateus de Jesus, tatoli katak foin lalais ne’e POLTRANS sira halo duni sosializasaun ba lampu tranzito ne’ebe monta iha linha zebra cross ne’e.
“Tanba komunidade barak sei konfuzaun hela tau lampu dobradu, maibe buat sira ne’e nia funsaun iha hotu, no sosializaun ne’ebe polisia foin lalais halo ne’e kapas, no tenke halo hanesan ne’e duni,” dehan Deputadu de Jesus.
Enkuantu komunidade Jose Amaral, dehan ida ne’e diak no iha duni mudansa, tanba fo-foun tau ne’e iha ema barak mak ladun iha konesementu.
