Reprezentante estudantes feto iha distritu Aileu ejiji ba governu liu-liu Ministerio Edukasaun atu kria infrastruktura eskola nian, liu –liu bee moos no sintina ne’ebe adekuadu iha sira nia eskola. 
Graciana Mendonsa, hateten durante ne’e bee moos no sintina sai preokupasaun bo’ot ba sira, tanba ne’e bainhira sente kabun moras, sira tenke halai ba uma.
Alem de sintina, sira mos husu ba Ministerio Edukasaun atu kompleta livrus, kria biblioteka no hasa’e kapasidade profesores sira iha materia espesifiku sira.
“Ami labarik feto husu ba governu atu supporta ami labarik feto ba edukasaun, viva labarik feto Timor –Leste,” Mendonsa sujere, bainhira selebra loron mundial ba labarik feto iha distritu Aileu.
Iha fatin hanesan estudante Angelina Ximenes, konkorda ho nia kolega katak sira presiza kondisons ne’ebe adekuadu atu tuir prosesu aprendijajen liu –liu sintina.
Iha okaziuan ne’e Angelina Ximenes no Graciana Mendonsa husu ba inan aman no profesores sira atu labele halo diskriminasaun ba sira labarik feto no fo importansia liu ba labarik mane sira atu asesu ba edukasaun nune’e mos iha prosesu aprendijajen tanba ema hotu iha direitu atu hetan edukasaun ne’ebe diak no kualidade.
Alem de kondisaun eskola, sira mos preokupa ho seguransa tanba iha area remotas distansia eskola ho hela fatin do’ok tebes.
Entretantu reprezentante Sekretaria Estado Promosaun Igualidade (SEPI), Hermino Xavier rekonese katak labarik feto iha area remotas sei susar atu asesu ba edukasaun tanba sei iha obstaklu barak hanesan kultura ne’ebe sei fo kontribuisaun bo’ot ba impedementu labarik sira no distansia.
“Labarik feto barak mak sei susar oituan asesu ba edukasaun tanba hare ba ita nia situasaun real ne’ebe iha infrastruktura, distansia ita hare kestaun seguransa ne’ebe sai mos kauza ba labarik feto sira atu partisipa edukasaun,” dehan Xavier.
Nia hatutan, katak SEPI sei esforsu maka’as atu muda mentalidade ema hotu nian no halo advokasia maka’as ba kultura sira ne’ebe sei kesi metin feto sira atu asesu ba aktividade hotu liu –liu edukasaun.
