United Nation Development Program (UNDP) suporta apoia $13,150,873,12 ba Ministeriu Justisa hodi fasilita servisu programa judicial nian ho diak liu tan.
Vise Ministru Justisa, Ivo Valente, hateten nudar parseiru dezenvolvementu ba Timor –Leste iha setor justisa, UNDP iha ona planu atu fo apoiu ba iha servisu setor justisa enjeral.
Nia hatutan, orsamentu husi UNDP ne’e ba tinan lima nian, hahu tinan 2014 $4,035,162,85, iha tinan 2015 ho montante $3,163,646,60, tinan 2016 $2,347,009,51, tinan 2017 $1,841,331,82 no ba tinan 2018 hamutuk $1,763,722,34.
“Maibe sira sei redus husi tinan ba tinan to’o iha 2018, ne’e signifika, katak maske UNDP fo apoiu, maibe nia husik hela ita atu ho kbi’it rasik atu finansia ita nia setor justisa,” Vise Ministru Justisa, Ivo Valente dehan, iha Colmera, Dili.
Nia informa, katak orsamentu ne’e barak liu aloka ba iha Sekretariu Estadu Terras Propriedade (SETP), tanba sira mak nesesariu liu no fo impaktu direitamente ba iha komunidades.
“Ikus –ikus ne’e konflitu hadau malu rai to’o baku malu no to’o sai krimi, tanba ne’e apoiu ba parte terras propridade, atu oinsa bele dezenvolve mediasaun ida diak,” Vise Ministru Justisa ne’e dehan.
Alem de ne’e, nia dehan, balun uja hodi haforsa papel Defensoria Publika, iha kapasidade atu elabora, atu rekolha no atu foti asaun, ba medidas kona ba rai entre povu ho sira.
“Ami mos sei suporta sentru investigasaun juridika, tanba kuandu forte, kapasidade diak, timor aon sira mos ho kualidade,” Vise Ministru Justisa ne’e katak.
Iha parte seluk membru Komisaun A (justisa, administrasaun no poder lokal), Deputadu Arao Noe, UNDP nudar parseiru dezenvolvementu ne’ebe fo ona kontribuisaun barak nasaun ida ne’e.
“Agradese ba ajudus sira ne’e, tanba sira mos hakarak involve ba dezenvolvementu iha setor justisa nian, ne’e suporta ne’ebe positivu tebes,” apoia Deputadu Noe.
Tanba ne’e nia husu ba ministeriu relevante ne’ebe simu apoia ne’e, atu uja didiak orsamentu ne’ebe iha, ba interese povu nian.
