Durante ne’e prizaun Becora no Gleno bainhira halo relatoriu uja deit sistema manual no ida ne’e fo impedementu ba servisu profesionalismu nian.
Diretor Nasional Prisional Timor-Leste (DNPTL), Helder Cosme Marcal Belo, hateten la’os deit halo relatoriu ruma maibe inklui mos hala’o linha servisu ho interministerial.
“Kada ves ami hato’o relatoriu ba Ministeriu Solidaridade Social, Primeiru Ministru no Prezidente Republika, ami nafatin servisu ho manual,” Diretor Belo kestiona, iha Hotel Timor, Dili.
Ezemplu, esperiensia bainhira husi Sekretaria Estadu Promosaun Igualidade husu dadus tinan 10 ba kotuk nian, iha tempu ne’eba husi prizaun susar atu fornese dadus ida ne’e no husi Ministeriu Solidaridade Social husu kona ba prizioneriu sira ne’ebe liberdade ona.
“Ami nafatin servisu ho manual,” Diretor Belo preokupa.
Alem de ne’e, nia dehan, mos asuntu operasaun tekniku, kada ves tau tiha mudansa husi preventive ba sentensa, dadus sira ne’e mosu dupla, entaun bainhira atu sura kuantidade ne’e, sei susar nafatin, maibe ida ne’e kestaun rekursu umanu.
“Mesmu ami iha difikuldade maibe ami sei nafatin servisu hamutuk ho justice facility, atu nafatin hala’o knar ami nian, jestaun ba rekursu umanu ba ami nian,” dehan Diretor ne’e.
Hatan ba preokupasaun ne’e Vise Ministru Justisa, Ivo Valente, katak sistema ne’e iha tiha ona, foin lalais Ministru Jusitsa, Prezidente Tribunal Rekursu hamutuk ho Prokurador Jeral da Republika, halo lansamentu ba Sistema Integradu Jestaun ba Informasaun.
“Entaun prizaun sira bele aproveita ho sistema servisu ne’ebe ho teknologia as, la hanesan manual ne’ebe baku ida-ida,” dehan Vise Ministru Valente.
Nia mos hatutan, agora dadaun tenke prepara rekursu umanu atu toma konta iha data baze, IT ne’e nia laran. Konaba atu asesu iha prizaun, ne’e tenke iha tekniku ne’ebe hatene no estuda dokumentus saida maka presiza public hatene no dokumentu balun public labele hatene.
“Ida ne’e ita sei servisu hamutuk ho ekipa ne’ebe mak Ausaid apoia, ita hein katak Ausaid fo apoia ne’e iha nia impact positifu ba funsionamentu IT nain ba data baze ida ne’e” dehan Vise Ministru Justisa ne’e.
