Klinika Marie Stopes Internasional Timor –Leste (MSI-TL) oferese linha informasaun gratuita ba foinsa’e sira hodi kontaktu no hetan informasaun klean kona ba saude reprodutivu. 
Koordenadora Klinika Marie Stopes Internasional Timor –Leste (MSITL), Maria Fernanda Serra, hateten linha informasaun ho numeru 8001001 ne’e hanesan meus ida atu fasilita foinsa’e sira hodi hatene diak liu tan oinsa atu uza orgaun reprodutivu.
“Agora dadaun ami iha programa foinsa’e nian ne’ebe MSI hala’o hanesan Kiss Infoline sira mos bele asesu ba informasaun husi via telephone,” Koordenadora Serra dehan, iha Villa Verde, Dili.
MSI iha ona planu atu halo diskusaun grupu ho joven sira kada sukus atu hasa’e sira nia konesementu kona ba saude reprodutivu, tanba fulan hirak ikus ne’e feto foinsa’e balun tara an kauza husi isin rua la ho hakarak.
Nia mos informa, katak durante ne’e MSI habelar ona informasaun no edukasaun kona ba saude reprodutivu ba iha komunidade sira iha distritu walu to’o iha nivel sukus inklui mos ba estudantes iha eskola pre-sekundaria no sekundario sira iha Dili laran.
Tuir estatistika MSI nian iha tinan 2012, hatudu katak iha foinsa’e feto no mane hamutuk nain 6,151 husu informasaun kona ba saude reprodutivu nian.
Iha parte seluk, Responsavel Saude Reprodutivu Foinsa’e Ministeriu Saude, Luisa Barros, hateten ministeriu dadaun ne’e fo prioridade mos ba iha saude foinsa’e nian, hanesan kria politika saude reprodutivu foinsa’e nian, sai mata dalan ba pesoal saude sira atu fo atendementu ba foinsa’e sira iha fasilidade saude no edukasaun advokasia.
Nia hatutan, katak ministeriu mos estabelese ona sentru espesifiku ida iha sentru saude Becora atu ne’ebe kompleta ho fasilidade no pesoal saude treinadu sira atu fo atendimentu no counseling ba foinsa’e sira ne’ebe hasoru probelam saude.
“Hau fo hanoin foinsa’e sira karik iha problema sira hakarak hetan informasaun diak liu tan ou hetan konsulta husi pesoal saude sira iha fatin proprio mesak ba sira,” dehan Nia.
Nia hatutan, katak ministerio mos servisu hamutuk ho diocese sira atu estabelese manual akonselamentu servisu saude amigavel ba foinsa’e sira ne’ebe sei estabelese iha tinan ida ne’e.
