Komemorasaun loron proklamasaun independensia Timor-Leste ba tinan ida ne’e governu deside ona fatin, hala’o serimonia iha Craras, distritu Viqueque.
Adjunto Administrador distritu Viqueque, Jose da Costa de Sousa, hateten preparasaun serimonia ba loron importannte ne’e Ministeriu Administrasaun Estatal halo ona diskusaun ho Administrasaun distritu Viqueque iha Craras.
“Preparasaun la’o dadauk hela iha ne’eba, ami fiar katak to’o molok atu ba 28 Novembru preparasaun tenke hotu,” Administrador de Sousa dehan, iha Craras.
Iha sorin seluk trabalhador kompania BTK,Francisco Quintao ne’ebe halo hela rehabilitasaun ba Igreja Craras informa katak,igreja ne’e sei prepara ba iha serimonia 28 Novembru .
“Tuir kontratu ne’ebe governu fo mai ami katak rehabilitasaun ba igreja ne’e durante fulan rua deit ne’ebe ami reboka hotu ona hein deit atu taka,” Quintao hato’o.
Nia hateten rehabilitasaun ba igreja ne’e durante ne’e sira servisu loron kalan deit.
“Ami mak fila ba uma maibe trabalhador Indonesia sira ne’e sira toba deit iha ne’e servisu loron kalan deit,”Quintao esplika.
Entretantu trabalhador husi Indonezia, Pak Men, hateten kontratu ne’ebe mak governu fo ba kompania ne’e durante fulan rua nia laran tenke finaliza .
“Ami dala ruma entrega ba governu iha fulan oin hanesan ne’e, tanba igreja ne’e ami hein taka deit ona tanba nia reboka mos hotu ona,” Men hato’o.
Nia hateten,hein taka kalen deit maibe seluk remata hotu ona.
Tuir observasaunTDW nian ba iha terenu katak kompanha BTK mak halo rehabilitasaun ba Igreja no Kompanha Dom Boaventura loke estrada husi Viqueque Vila to’o mai Craras.
Loke estarada foun ne’e tiha ona to’o iha jardin Craras maibe rai rahun mak suar maka’as maibe kompanha refere kontinua rega nafatin.
