Kondisaun infraestrutura Eskola Pre-sekundariu Publiku (EPS) numeru 01 distritu Viqueque grave, tanba kalen kuak hotu plafon taka eskola balun monu hotu ona.
Agapito Martins, Diretor da Eskola Pre-sekunadriu Publiku , hateten problema ne’e hato’o tiha ona ba iha Ministeriu da Edukasaun (ME) maibe to’o agora seidauk iha respostas.
“Ami mos hato’o ona ami nia proposta kona ba kondisaun eskola ne’e ninian,” Diretor Martins dehan.
Diretor ne’e esplika, eskola EPS no.01 ne’e iha salas aulas hamutuk iha sala walu mak kondisaun ladiak ona.
“Iha tempu udan labarik sira, ami tenke muda sira ba sala ida ne’e maran para tuir lisaun,”nia dehan.
Diretor Martins afirma, iha loron 06 fulan Setembru 2013 Ministru da Edukasaun ba hare tiha ona kondisaun eskola refere maibe Ministru Bendito Freitas dehan hein deit.
“Ami hein deit tanba ida ne’e desijaun husi leten ami pasiensia tuir deit ona,”Martins katak.
Total estudantes ne’ebe eskola iha fatin refere hamutul 574 estudantes no profesor hamutuk 43 pessoas ho numeru ne’e professor voluntariu hamutuk nain ualu .
Iha fatin hanesan Florindo Pereira, nudar estudante iha eskola refere sublina katak,tempu udan sira tenke halai ba mai buka fatin ne’ebe mak maran tanba eskola be’e tama deit.
“Ami nia eskola ne’e tempu udan ne’e ami araska tebe-tebes tanba ami nia sala be’e tama deit,”Pereira katak.
Estudante ne’e mos sujere ba governu atu hadia netik sira nia eskola para sir abele tuir aprendizajen ho diak.
Entretantu Adjuntu Administrador distritu Viqueque, Jose da Costa de Sousa rejeita katak, eskola iha distritu Viqueque laiha ida mak kategori grave.
“La’os grave maibe falta ekipamentus,”Adjuntu Administrador ne’e dehan.
Governu iha posibilidade atu rehabilita eskola ne’e maibe la’os agora, tenke tuir prioridade ne’ebe mak iha.
Tuir observasaun TDW nian ba iha eskola refere hare’e katak,kalen eskola dodok hotu ,odamatan eskola mos balun hetan estragus ona,plafon eskola nian mos dodok hotu inklui animal hanesan fahi karau mos tama eskola te’e iha eskola sori-sorin arbiru deit no mos menus fasilidades hanesan meja no kadeira sira.
Observasaun TDW nian mos nota, katak wainhira tempu udan fo difikulta tebe-tebes ba estudantes sira nia aprendisajen tanba sala eskola maioria kalen kuak hotu.
