Ameasas lapindo (tahu) iha sentral eletrika Betano ne’ebe akontese iha fulan hirak ba kotuk, dadaun ne’e rezolvidu tanba moru protesaun hadia hotu ona.
“Espesialista mai husi liur sira halo teste, ne’ebe agora buat hotu iha ona nia progresu la’o iha ne’eba,” Diretor Jeral Eletrisidade, Virgilio Guteres, iha Kaikoli, Dili.
Alem de ne’e membru Komisaun E (infraestrutura, transportes no komunikasaun), Deputadu Manuel de Castro Pereira, hateten lapindo mosu tanba sira ke’e kolam haleu sentral eletrika mak bee sa’e.
“Maibe kona ba nia konstrusaun hau bele dehan, ita la ragu tanba konstrusaun ne’e metin,” Deputadu Castro informa.
Deputadu ne’e diskonfia, katak iha bee matan iha rai okos besik Sentral Eletrika Betano.
“Foin dadauk ami ba halo inagurasaun ne’e be’e ladun bo’ot ona, tanba be’e ne’e mosu do’ok husi lutu,”nia dehan.
Iha sorin seluk Prezidenti Komisaun E Parlamentar,Deputadu Pedro da Costa, katak lapindo la fo impaktu ba sentral eletrika ne’e, tanba antes ne’e halo ona estudu jeolojiku no estudu tektoniku iha fatin ne’e.
“Kestaun tahu mosu ne’e tanba iha foho leten ne’e bee matan ida iha ne’eba,” Deputadu da Costa afirma.
Tuir nia, ida ne’e akontese tanba laiha kanalizasaun bee matan ba iha tasi, entaun bee tun fali ba iha sentral eletrika refere.
“Sira hanoin ona atu valeta bo’ot ida atu dada bee ne’e ba to’o tasi,” nia dehan.
