Membru Parlamentu Nasional sente preokupadu no lamenta tebes ho kondisaun HNGV ne’ebe dadaun ne’e krizi hela ba oksigeniu.
Deputadu Antonino Bianco, hateten kestaun ida ne’e la’os foin akontese, maibe bibeik ona tinan ba tinan nafatin hela deit to’o rezulta ema barak mak mate.
“Hau rasik hare ho matan iha ospital nasional hau tama uma ora madrugada oksigen laiha, sa tan iha nivel kraik liu, doutor sira dehan ami atu halo buat ruma maibe ami labele,” Deputadu Bianco kestiona, iha plenaria dahuluk hafoin resesu fulan rua, iha Parlamentu Nasional.
Iha momentu ne’eba, nia husu ba pesoal sira ne’ebe iha ospital Nasional Guido Valadares (HNGV) kona ba kestaun ida ne’e, maibe pesoal sira dehan oksigen laiha kleur ona
“Pesoal saude sira mos agradese, tanba ho prezensa membru parlamentu iha ospital bele hatutan sira nia lian ba nai ulun sira atu resolve problema ne’e,” Deputadu Bianco preokupa.
Nia hatutan, durante ne’e medikus sira sai vitima, tanba laiha fasilidade ne’ebe sufsiente atu fo atendementu ne’ebe diak ba povu sira.
Entretantu Diretor Jeral HNGV, Domingos Soares, via telephone rejeita informasaun ne’e, tanba oras ne’e dadaun oksigeniu iha HNGV sufsiente hela atu fo atendementu ba pasiente sira.
“Oksigeniu ami iha hela,” DJ Soares hatan.
Enkuantu Diretora Jeral Servisu Autonomo Medikamentus e Ekipamentus da Saude (SAMES), Odete Maria Freitas Belo, hateten stok oksigeniu iha SAMES sufsiente hela atu fo atendimentu ba pasiente sira tanba kontratu entre SAMES ho kompania supplier sei iha to’o dia 22 fulan Setembru tinan ida ne’e.
Nia dehan, distribuisaun oksigeniu ho aimoruk,fasilidade saude sira mak tenke hato’o pedidu ba SAMES, foin distribui tuir.
“Oksigeniu iha maibe pedidu mak la mai,” Diretora SAMES ne’e dehan.
