Administrasaun sub-distritu Atauro,Distritu Dili obrigatoriu tenke hala’o kna’ar iha tempu kalan, tanba eletrisidade iha tempu loron la funsiona ( mate).
Administrador Distritu Dili,Gaspar Soares hateten, eletrisidade iha sub-distritu Atauro lakan deit iha tempu kalan, maibe iha loron mate.
“Ita hotu sente triste ho situasaun ida ne’e,” Administrador Soares preokupa, iha Dili.
Entretantu Deputadu husi Bankada Congresu Nasional Rekonstrusaun de Timor (CNRT), Manuel da Costa Guteres promote sei hato’o kestaun ne’e ba iha ministeriu kompetente, nune’e bele resolve.
“Ita hotu hatene katak, sub-distritu Atauro ne’e distritu ida ne’ebe mak separadu husi ita nia ilha timor nian, ne’ebe presiza tau atensaun masimu,” Deputadu Guteres dehan.
Hatan ba preokupasaun ne’e Diretor Nasional Eletrisidade de Timor-Leste (EDTL), Virgilio Guteres rekonese katak, ahi iha fatin ne’e la funsiona iha tempu loron, tanba laiha transporte regular ba iha Atauru hodi tula mina ba.
“Problema mak, agora sub-distritu iha Timor laran ne’e la’o seis oras de tempu deit ,entaun difikulta mos ba sira atu hala’o servisu ba iha loron,” Diretor ne’e katak.
Diretor ne’e realsa, katak la’os sub-distritu Atauro mesak deit mak akontese problema hanesan ne’e, maibe sub-distritu sira seluk mos.
Hanesan sub-dsitritu Fatululi, Fatumea, Fohorem, Tilomar, Soibada, Lakluta, Natarbora, fatuberliu, Alas, Turiskai, Balibo inklui sub-distritu Hatulia, ahi lakan seis oras deit.
“Ami hakarak hateten deit katak ba sub-distritu sira ami labele fo ahi 24 oras, so 24 oras ba sira ne’ebe rai bo’ot ne’ebe mak ligadu ona ba iha Sentral Eletrika Hera no Betano, mais Atauro seidauk, tanba lori kombustivel ba iha ne’eba defisil,” Guteres hato’o.
Maibe nia dehan, wainhira iha sub-distritu iha Timor laran tomak ligadu hotu ona Sentral Eletrika Hera no Betano mak foin fokus ba sub-distritu Atauro.
