Atu fasilita servisu peskizador sira iha Komisaun Anti Korupsaun nian la’o ho diak liutan, Ajensia Internasional Millenium Challenge Corporation entrega tablet elektronika 30 ba Komisaun Anti Korupsaun.
Prezidente Komisaun Anti Korupsaun (KAK), Aderito Soares hateten,Tablet tne’e ekipamentu ida ne’ebe mak mais importante wainhira halo peskiza ruma iha distritu sira, iha minute ida ka rua nia laran deit dadus kolekta sira to’o lalais iha server KAK.
“Ho tablet ne’ebe mak fo bele ajuda liutan servisu KAK nian,” Komisariu Soares dehan, iha konferensia imprensa iha Farol, Dili.
Nia dehan, ne’e la’os foin primeira vez, maibe desde estabelese KAK iha tinan 2010, USAID fo ajudus lubuk ida ona.
“Hau agradese tebes ba Millenium Challenge Corporation ne’ebe prezensa husi Senhor Malik Chaka ne’ebe mak mai husi Washington vizita loron hira iha ne’e, hau hodi Komisaun Anti Korupsaun nia naran hakarak agradese ba programa MCC ne’ebe parseru ho USAID desde inisiu ajuda KAK to’o horas ne’e,” Komisariu Soares fo agradese.
Entretantu Diretor Milenium Challenge Corporation (MCC), Malik Chaka dehan, iha fulan Julhu 2013 MCC fo fundu ba AusAID hodi hala’o programa anti korupsaun liu husi Diresaun Edukasaun no Peskiza KAK nian hodi dezenvolve levantamentu ida ne’ebe integridade ba iha publiku.
Nia hateten, liu husi ajudus ida ne’e bele halo desizaun estratejiku hodi aumenta kapasidade internal atu dezenha kestionariu peskiza no hala’o kolesaun dadus hotu hodi analiza kna’ar sira.
“Aproximasaun ne’e sei fasilita KAK hodi kontinua dezenvolve instrumentu peskiza tekniku oituan,” Chaka dehan.
Diretor MCC ne’e realsa katak,ekipamentu hirak ne’e bele fo benefisiu diak liutan ba area peskiza ninian.
“Primeiru bele hase’es husi surat tahan ba kestionariu elektroniku atu nune’e bele hamenus erru intrevista, no segundu mak dadus bele kualidade diak liu tan durante hala’o servisu iha baze,”Chaka informa.
KAK iha rekursu umanu no ekipamentu hodi halao servisu levantamentu ninian.
“USAID apoiu inisisativa ida ne’e hanesan parte kontinuidade parseria ho KAK inklui treinu instrusaun hodi kontrola no apoiu atividade iha koordenasaun ho diresaun investigasaun ba prevensaun korupsaun,”Cahaka hato’o.
Iha sorin seluk Adjuntu Komisariu ba Edukasaun no Peskiza,Jose Neves ba jornalista sira katak,tablet ne’e intsrumentu elektronika ida atu fasilita servisu peskiza ninian.
“Bai-bain ne’e ita halo survey ne’e surat tahan mak barak, mais ho utilizasaun ekipamentus elektroniku ida ne’e bele fasilita intervista lalais no nia rejultadu preliminariu ne’e loron ida ita hetan kedas,” Neves esplika.
Adjuntu KAK ne’e dehan,utilizasaun ekipamentus refere bele fasilita lalais rezultadu peskija nian mai iha server KAK hodi apload.
