Diretor Ezekutivu Judicial System Monitoring Program, Luis de Oliveira Sampaio, husu ba governu atu tradus hotu leis ne’ebe iha ba iha lian Tetun, tanba komunidade barak mak la komprende kontiudu leis ne’ebe iha.
Diretor Ezekutivu Judicial System Monitoring Program (JSMP), Sampaio hateten, leis ne’ebe iha barak liu hakerek ho lian Portugues, klaru komunidade sira iha area rural ne’ebe la hatene Portugues, susar ba sira atu komprende.
“Ne’e ami nia preokupasaun iha tinan barak ona, wainhira ami halo monitorizasaun iha tribunal iha dezafiu barak, tanba ne’e ami halo relatoriu barak no analiza oin-oin, no ami hasoru malu ho parlamentu bebeik no governu, maibe ami seidauk hare nia mudansa,” Diretor Sampaio preokupa, iha Colmera, Dili.
Nia dehan, lian Tetun mos nudar lian ofisial Timor-Leste nian, ne’e duni wainhira halo lei ida, tenke tradus mos iha lian Tetunn nune’e komunidade sira bele hatene kontiudu lei ne’ebe iha.
“Wainhira ami ba iha komunidade, sira mos lamenta ho kestaun ne’e, tanba ne’e husu ba governu atu bele hare asuntu ne’e ho seridade,” Diretor JSMP ne’e dehan.
Hatan ba preokupasaun ne’e, Ministru Justisa, Dionisio Babo, katak atu tradus lei hotu-hotu ba Tetun, la’os kestaun ida fasil, maibe presiza la’o neneik.
“Agora dadaun governu iha ona politika ida, atu halo tradusaun ba Tetun antes ba halo sosializasaun,” Ministru Justisa Babo dehan.
Nia rekonese katak, leis hirak ne’ebe iha durante ne’e hakerek ho lian Portugues, tanba susar ba komuidade sira atu komprende.
“Hanesan foin lalais ami halo lei kona ba droga, ami halo kedas versaun Tetun nian, atu nune’e hotu-hotu bele asesu,” Ministru Babo katak.
Iha lidun seluk Deputadu Francisco da Costa, hateten importante tebes atu lei sira ne’e tradus ba lian Tetun, nune’e komunidade sira fasil atu komprende.
