Diretor Nasional Aksaun Sosial, Ministeriu Edukasaun, informa katak programa merenda eskolar to’o agora seidauk ativa fila fali tanba prosesu tranferensia osan ba iha konta bankaria tarde.
“Ami nia proposta atu halo transferensia tama ona agora bainhira mak atu transfere ne’e husi diretor finansas mak hatene,”dehan Diretur Nasional Aksaun Sosial,Carlito Mota, iha Salaun Eis CNRT, Balidi, Dili (09/09/2013).
Diretor Mota hatete katak hosi sira nia parte sira pronto atu implementa ona programa merenda eskolar.
“Husi ami nia parte Aksaun Sosial ne’e hotu ona, proposta ami hatama ba iha finansas agora hein deit.”
Iha fatin hanesan Diretur Jeral Ensino Baziku, Cidalio Leite, mos rekonhese katak programa merenda eskolar paradu durante fulan ida nia laran ona maske iha ona prosesu nia laran.
“Konaba merenda eskolar to’o agora paradu duni maibe iha ona prosesu nia laran la kleur bele lao fila-fali ona,”dehan Diretor Jeral Leite.
Iha sorin seluk estudante Eskola Primaria Farol, Manuel Pinto Soares, hato’o katak iha sira nia eskola la han kuaze fulan ida ona.
“Ami loro-loron la han ona tanba saida hau la hatene mais profesor sira dehan hahan la iha ona,” hato’o estudante Soares.
Estudante ne’e haktuir mos katak merenda eskolar sei lao loro-loron modo han na’an deit.
“Mais agora la iha ona ami atu han mas tuir profesor sira dehan hahan mak hotu ona.”
Estudante Soares husu ba governu atu oferese nafatin merenda eskola baiha eskola hotu-hotu atu nune’e sira bele han.
