Klinika Marie Stope’s Internasional kolabora ho Klinika Bairo-Pite fo konsulta jeral ba komunidade sira iha suku Dare, sub-distritu Vera Cruz, distritu Dili, ho sistema sai tama uma komunidade nian.
Koordenadora Klinika MSITL, Fernanda Maria Serra, hateten sira hili suku Dare, tanba durante hala’o programa Servisu Integrado Saude Komunidade (SISCA) iha suku ne’e, komunidade barak mak sei susar asesu ba asistensia saude ho zhela dook.
“Entaun, ami iha hanoin atu ajuda populasaun sira iha ne’e liu husi fo tratamentu gratuita ba sira, tanba ami baibain mai iha deit kraik, susar ba sira atu asesu to’o iha ne’eba,” Koordenadora Serra dehan, iha Dare, Dili.
Nia dehan, konsulta jeral ne’e nudar parte ida hodi selebra loron konsulta popular ba dala-14, ne’ebe monu iha dia 30 de Agostu kada tinan.
Entretantu Xefe Aldeia Kulau II, Abel Bareto apresia tebes ho prezensa MSITL ho pesoal saude husi Klinika Bairo Pite ne’ebe lori asistensia saude to’o iha sira nia aldeia, tanba durante tinan tolu ona sira la asesu ba asistensia saude.
Nia rekonese katak, programa SISCA tama duni iha sira nia suku, maibe susar ba komunidade sira ne’ebe hela iha aldeia izoladu atu asesu ba no imposivel ba sira ne’ebe moras no isin rua atu la’o ain klilomentru lima atu ba iha postu SISCA.
“Hau hanoin ba oin sira halo hanesan ne’e nafatin kapas bele fo tratamentu ba komunidade sira ne’ebe presiza sira nia tulun,” dehan Xefe Suku Bareto.
Iha okaziaun ne’e sira mos husu ba MSITL atu koopera ho sentru saude sira bele fo tratamentu rutina kada semana ba komunidade sira iha area ne’ebe izoladu, hanesan aldeia Kulau II, tanba komunidade presiza informasaun no atendementu saude.
Hatan ba ne’e Koordenadora MSITL, Fernanda Maria Serra, katak sira prontu atu halo tratamentu rutina maibe depende ba xefe sukus sira, tanba durante ne’e sira halo ona tratamentu jeral iha suku Dare ba dala tolu ona.
Iha parte seluk, pasiente Joaquina de Araújo, husu atu programa SISCA labele konsentra deit iha fatin ida, tanba komunidade balun hela do’ok husi suku, susar ba sira atu asesu atendementu saude ne’ebe hala’o hela.
“Durante ne’e programa SISCA la’o duni iha ne’e maibe iha konsentra deit iha sede suku ne’eba ami sira iha ne’e la mai ,entaun ami labele asesu ba atendementu ne’e tanba atu ba sede suku ami tenke la’o ain kilomentru lima resin,” nia hateten.
Bazeia ba lista tratamentu ne’ebe iha hatudu katak sira konsege fo atendementu saude ba pasiente kuaze 174 kompostu husi labarik to’o invalidu sira.
Moras ne’ebe registu as iha atividade tratamentu loron sorin ne’e mak moras ISPA, Dearea, Mear, moras kulit inklui mos halo imunizasaun ba labarik ki’ik sira no fahe mos vitamina A, lumbringa ba labarik idade tinan lima mai kraik.
