Estudantes husi Universidade Nasional Timor-Lorosae nain hat ne’ebe partisipa iha selebrasaun loron FALINTIL no desmobilizasaun ba Forsa Defeza Timor-Leste iha Betano, afetadu moras estomuk, tanba tarde han.
Estudantes husi Universidade Nasional Timor Lorosa’e (UNTL) ne’e organiza husi Asesor Prezidenti da Republika nian, maibe to’o iha Betano sira abandona tiha estudante hirak ne’e no ikus mai sira tenke moras estomuk.
“Asesor Senhor Aniceto mak responsabel ba ami,maibe lori ami to’o tiha mai iha ne’e hahan ba labarik sira sempreatraza hela deit,” Koordenador Estudante UNTL, Andre da Costa Oliveira preokupa, iha Betano.
Nia dehan, estudante sira ne’e hetan fiar husi governu ba hananu kanta hino nasional iha seremonia isar bandeira, maibe sira hamlaha oinsa bele hananu ho diak.
“Ami mai akordu ho senhor Asesor Aniceto, katak buat hotu-hotu hanesan hahan no fasilidades kompletu, maibe ami to’o iha ne’e labarik sira kestiona kona ba hahan la tuir tempu ne’ebe mak iha,” Koordenador Oliveira lamenta.
Kordenador ne’e esplika ,nia sempre kontaktu hodi hato’o problema ne’e ba Asesor Aniceto maibe hahan sira mai sempre tarde hela deit .
Ho ida ne’e, nia dehan, difikulta ba estudantes sira sempre atraza orariu ensaiu hamutuk ho Forsa Armadas sira ba isar bandeira iha fatin seremonia. Nune’e mos estudante hamutuk 58 ne’e sempre hetan hakilar husi forsa sira, tanba la kumpri orariu ensaiu .
Nia realsa tan katak aproximasaun ho Asesor PR Aniceto das Neves halo tiha ona maibe rejultadu sempre atraza.
“Primeiru dia ami mai iha ne’e han fali iha 12 kalan,tuir lolos labarik sira han tuir horas para bele fasilita sira aktividade ne’e lao ho diak,”koordenador ne’e hato’o.
Entretantu Estudante UNTL, Alexandre Marques akresenta tan katak, molok sira sai husi Dili ekipa organizadu ne’ebe responsavel husi Asesor Aniceto, hateten fasilidades inklui konsumsi ba estudante sira laiha problema, tanba buat hotu prepara ona .
“Ami mai iha ne’e laos ami nia hakarak maibe tanba hetan konvite ami lakon materia la problemas ba ami tanba ami hakarak ami hatudu ami nia patriotismu no nasionalismu ba nasaun ne’e.agora ami to’o tiha ne’e mak mosu fali problemas hanesan ne’e halo aqmi deskonteti,”Marques la menta.
Estudante husi Fakuldade Enjenaria ne’e husu ba komisaun organizadora atu fo atensaun ba kestaun ne’e hodi nune’e ba futuru labele repete tan.
“Senhor asesor rasik mai iha ami nia fatin konsege lori ami ba han iha Same, maibe to’o iha Same ami atu han mos tarde teb-tebes, ensaiu deit tuku tolu, mais ami han ne’e tuku 2 :30, ne’ebe ami ba iha fatin ne’eba maun forsa sira hirus fali ami,” estudante ne’e konta.
Nia hatutan, orariu ensaiu sira sempre ba tarde hela deit, tanba hahan ba tarde entaun difikluta ba sira nia aktividade.
“Ita ba kanta ne’e mos persiza ita nia enerzia mais ita la han ita nia enerzia la iha oinsa mak ita nia lian sai ,”Marques hato’o.
Hatan ba preokupasaun ne’e Asesor Aniceto das Neves, katak la’os nia mak responsabilidade ba hahan, maibe Ministeriu Soslidariedade Sosial mak responsabiliza.
“Hau akompanha sira ne’e tanba labarik sira hau nia estudante hotu maibe konaba hahan ne’e panitia nasional,”asesor ne’e informa.
Nia esplika, parte konsumsi laos nia mak responsabilija maibe parte husi komisaun alojamentu ba eventu mak responsabiliza.
